Iha loron 1 fulan Junho kada tinan governu Timor-Leste selebra loron ne’e iha distritu hodi kria aktividade ba labarik sira iha distritu, ba tinan ida ne’e governu liu husi komisaun nasional direitu labarik (KNDL) selebra iha distritu Aileiu alende ne’e Guarda Nasional Republika Portugal (GNR) kria aktividade hanesan material saúde, desportu no edukasaun dezenho ba labarik ensino primaria sira iha capital laran atu hasae sira nia kunesementu ba fasilidade saúde no desportu ba labarik sira tanba GNR laos iha area seguransa deit maibe iha mos medisina.
“Hau hanoin ida ne’e importante tebes ba labarik sira atu kuinese diak liu tan konaba fasilidade saúde nian no oinsa atu ajuda ema ne’ebe presiza hafoin lori ba ospital karik labarik sira bo’ot iha interese ba departamentu ida ne’e sira laiha dificuldade,” dehan Sarjentu Chefe Enfermeiru GNR, Helder Assunção, (01/06) iha Palacio Governu.
Nia hatutan katak alende aktividade saúde iha mos aktividade seluk hanesan tula labarik iha kareta halai haleu iha palasio oin, desportu, edukasaun dezenho to’o lokraik atu hatudu ba labarik sira katak GNR laos inimigo ba labarik maibe amigo ba komunidade liu-liu labarik sira.
Iha parte seluk, estudante Natania Marcia hateten katak sira sente kontenti tebes ho aktividade ne’ebe GNR fo ba sira hodi halibur hamutuk maibe sira sente triste tanba laiha membru governu ne’ebe partisipa iha aktividade refere.
“Ami husu ba governu foun ne’ebe mai atu tau matan ba eskola sira hotu ne’ebe iha teritorio tomak atu ami bele tuir prosesu aprendizazen ho diak no tau matan mos ba kolega sira ne’ebe la eskola,” dehan Marcia
Iha oportunidade hanesan professora,Markita Trindade hateten katak kolaborasaun ne’ebe professores sira ho GNR ne’e diak tebes tanba bele halibur labarik sira ho aktividade ne’ebe oioin hodi hasae sira nia kuinesementu iha area saúde ne’e importante tebes inklui mos dezenho.
“Hau hare katak maske loron manas maibe labarik sira sente orgulho bo’ot atu halimar ho GNR sira no labarik sira mos sente livre los iha loron ne’e rasik,” dehan professora Trindade.
