Analistas balun hare ba situasaun rai laran hateten katak durante tinan 10 nia laran Estado seidauk fo protesaun ne’ebe diak ba direitu labarik nian liu-liu labarik sira ne’ebe konflitu ho lei no sempre trata sira hanesan ema bo’ot uza lei kodigu prosesu penal no kodigu penal tanba estado no governu seidauk iha seriadade ba asuntu labarik.
Kona ba ne’e organizasaun naun governmental Forum Tau Matan (FTM) husu ba governu no Parlamentu foun ne’ebe sei mai atu tau inportansia ba asuntu labarik liu –liu esbosu lei kodigu labarik no lei justisa juvenil ne’ebe to’o agora laiha seidauk aprova.
“Laos selebra deit loron mundial ba labarik maibe estado mos iha obrigasaun atu halo servisu ne’ebe durante tinan lima governu Aliansa Maioria Parlamentar seidauk halo maske halao buat barak ona maibe konaba legislasaun hanesan esbosu lei kodigu labarik no justisa juvenil to’o agora ita seidauk iha ida mak aprova,” dehan xefe depatamentu protesaun labarik, Xisto Gonsalves, (01/06) iha knar fatin Kaikoli Dili.
Nia hatutan katak esbosu lei justisa juvenil iha artigu 1 to’o 99 parte hat mak hanesan parte ida koalia konaba definisaun jeral (idade), tuir direitu labarik nian iha parte oioin (asesu ba saúde, edukasaun no seluk), medidas protesaun ba labarik, ikus mak papel komisaun nasional direitu labarik (KNDL).
Iha parte seluk, presidente komisaun A , Deputada Fernanda Borges hateten katak iha Timor-Leste labarik barak mak monu ba risku tanba kondisaun tasa pobreza ne’ebe as iha rai laran no lei protesaun ba labarik ne’ebe seidauk konsege aprova hanesan esbosu lei Justisa juvenil, kodigu ba labarik ne’ebe agora iha gabineti ministerio justisa.
“Esbosu lei ne’e agora iha hela ministerio justisa ami hakarak hare lei ne’e mai iha parlamentu no ami hakarak hare katak direitu labarik nian mosu klaru iha ita nia lei no asegura konvensaun direitus labarik nian ita implementa duni ne’e mak importante ba ita,” dehan deputada Bosges (01/06)iha edifisiu Coreios Mascharinas Dili.
Nia hatutan katak Timor-Leste tenke iha lei espesial ida atu asegura katak labarik sira laos kriminozo maibe atu sira bele rekuinese salah ne’ebe sira halo liu husi instituisaun ne’ebe tau matan ba labarik sira no estado iha obrigasau luta hasoru ki’ak tanba halakon ki’ak prioridade atu asegura labarik sira moris diak.
