Atu sai organizasaun ne’ebe indepedente, forte, imparcial, defende unidade nasional no responde ba nesesidade joven sira nian iha rai laran diak liu tan iha futuru Conseilho Nasional Joventude Timor-Leste (CNJTL) realize terseiru kongresu nasional (4-6/6) atu hili lideransa foun ba CNJTL nian no estatutu hodi bele fo responde ba nesesidade ne’ebe joventude Timor-Leste sira imfrenta iha futuru mai.
“Iha kongresu ida ne’e ami sei halo diskusaun klean konaba planu estrategiku no destinu CNJTL nian ba tinan lima mai ho estruktura ne’ebe foun tanba partisipantes sira mai husi struktura ne’ebe CNJTL estabelese ona iha 13 distritus no 65 sub-distritus,” dehan Vice Presidente organizador,
Nia hatutan katak iha loron ikus sira sei halo elisaun ne’ebe demokratiku, kredivel no justu hodi hili struktura foun ne’ebe atu tur iha CNJTL halao sira nia mandatu durante periode 2012 to’o 2017.
Iha oportunidade hanesan, Presidente da Republika, Taur Matan Ruak hateten katak nia iha principio hat ba joven sira atu kontribui ba dezenvolvimentu mak ida joventude labele sai objeitu no subjeitu ba transformasaun Timor-Leste katak nudar joven hanesan outor ba dezenvolvimentu tenke hateke ba oin tinan 30 mai labele hateke ba ain fatin deit, fiar joven tenke iha fiar , kompetensia nudar joven kada loron tenke adapta an iha sosiedade nia laran, disiplina importante inklui mos parsistensia tanba iha buat barak mak ejiji ita hotu nia partisipasaun.
“Presidente da republika iha disponivel atu halo parseria ho imi tanba hau nia filosofia mak nasaun ida ne’ebe la involve sidadaun iha prosesu dezenvolvimentu nasaun ida ne’e futuru laiha, importante imi hatudu ba ema katak laho ami nia kontribuisaun Timor laba oin no ita sei ladezenvolve ita nia rai para ita hotu sente ita hotu iha fatin atu fo kontribuisaun ba dezenvolvimentu ita nia nasaun,” dehan PR TMR, (04/06) iha sentru convensaun Dili.
PR espera katak ho kongresu ne’ebe CNJTL halao bele hetan susesu ne’ebe diak iha futuru presidente pronto atu fo apoiu tuir ki’bit ne’ebe iha.
Iha parte seluk, kongresista husi distritu Viqueque, João de Oliveira hateten katak sira identifika ona kestaun ne’ebe presiza hetan atensaun husi CNJTL no estado mak laos buat seluk maibe kampu de servisu, hasae kapasidade rekursu umanu atu iha abilidade hodi partisipa iha prosesu dezenvolvimentu nasional.
