Tanba ne’e Ministeriu Edukasaun (ME) halo ona esforsu hodi implementa programa analfabetizasaun iha 2007 to’o agora, atu oinsa mak bele sira ne’ebe uluk la konsege eskola, bele hatene lee no hakerek.
“Timor-Leste hola parte iha mundu internasional ne’ebe halo ezijensia halakon analfabetizasaun tanba ne’e hahu iha 2007 to’o agora, ita fo ona graduasaun ba partisipantes feto no mane hamutuk sentu oitenta i un mil novisentus i tal (181.900 resin), 68 pursentus reprezentante populasaun ne’ebe la hatene lee no hakerek,” hateten Diretor Nasional Ensino Rekorente iha ME, Filomeno L. dos Reis Belo, (23/05), iha Salaun Delta Nova, Comoro, Dili.
Nia hatutan, Ensino Rekorente iha ona dadus estatistika maibe seidauk iha numeru fiksu kona ba populasaun feto hira no mane hira mak moris ho analfabetizasaun, no hira mak livre.”numeru global mak iha,”.
Tuir nia, Ensino Rekorente nafatin fo oportunidade ba partisipantes sira ne’ebe iha interese, liu-liu inan feto sira ne’ebe seidauk hatene lee no hakerek, atu bele tuir nafatin programa alfabetizasaun tanba sei iha kontinuasaun.
Enkuantu Distritu ne’ebe livre ona husi analfabetizasaun hamutuk distritu sia, e distritu ne’ebe sei iha prosesu aprendizajen durante fulan tolu no sei halo provas hodi hatene partisipantes sira hatene ona hakerek no lee mak distritu hat (Dili, Viqueque, Bobonaro no Ainaro).
“Espera katak iha fin do ano Timor-Leste bele livre ona husi analfabetu,” Diretor ne’e esperansa.
Iha parte seluk Sekretaria Estadu Promosaun Igualidade (SEPI), Idelta Maria Rodrigues rekonese katak iha duni progresu diak iha programa analfabetizasaun ne’ebe durante ne’e ME hala’o, tanba bazeia ba survey demografi iha 2003, feto iha alfabetizasaun hamutuk 45.4 pursentus (45,4%).
“Ne’e mudansa signifikativu ne’ebe ita hare iha taxa analfabetizasaun nian,” dehan SE Rodrigues.
