“Ami husu ba Governu liu husi Ministeriu Justisa atu bele fo prolongasaun tempu ba formasaun, atu nune’e advogadu sira seluk mos bele hetan asesu formasaun,” sujere Diretor Fundasaun Edukasaun Comunidade Matebian (FECM), Lino Lopes, semana kotuk (14/05), iha Hotel Timor, Dili.
Tanba tuir nia, durante ne’e lei ne’ebe maka regula kona ba advogadu ne’ebe tuir formasaun to’o deit iha 30 Julhu 2012, wainhira kuandu to’o ona tempu ne’e formasaun tenke taka.
“Durante ne’e governu aseita ona atu prolonga tempu, maibe mekanismu atu halo revisaun ba lei numeru 11 2008 sai hanesan dezaviu, dalan simples bele liu husi parlamentu ami iha esperansa boot ba parlamentu hodi bele halo revizaun ba lei advokasia ba tempu badak nia laran,” tenik Diretor Lopes.
Hatan ba kestaun ne’e, Vise Ministru Justisa, Ivo Valenti, katak agora dadaun governu liu husi Ministeriu Justisa esforsu atu altera lei numeru 11/ 2008 kona ba formasaun ba advogadu sira.
“Governu halo esforsu ida atu altera artigu ne’ebe maka dehan advogadu sira nebe maka pratika to’o deit 30 Julhu 2012, bele estende tan sira nia pratika ba to’o fulan Dezembru tinan 2015,” dehan Vise Ministru Valenti.
Tuir nia, lei ne’e to’o ona iha Parlamentu Nasional Comisaun A, no hein katak comisaun bele altera lei ne’e no muda lei ne’e hodi fo oportunidade ba Advogadu, Jurista, Lisensiadu atu bele pratika nafatin.
