“Hau nudar Vise Prezidente Komisaun F, hare asuntu ne’e laran la kontente, tanba buat ne’ebe ita hatete maluk sira iha governu la fo atensaun ba sasan sira ne’ebe importante tebes atu salva ema nia vida,” dehan Deputadu Francisco Jeronimo, semana kotuk (02-05), iha Uma Fukun, Dili.
Nia parte lamenta tanba iha konstituisaun hakerek ona, katak sidadaun hotu iha direitu atu hetan saude ho gratuita, maibe realidade iha sentru saude balun pasiente mak sosa kombustivel.
“Pasiente sosa rasik kombustivel enxe iha kareta ambulansia, nune’e bele tula sira ba Ospital Referal Baucau, atu hetan tratamentu intensive, tanba Sentru Saude iha Distritu Lautem laiha kombustivel,” hateten Deputadu Jeronimo.
Tuir nia, problema falta konbustivel iha Sentru Saude la’os foin akontese no la’os deit iha Distritu Lautem, maibe dalabarak ona e kontinua to’o ohin loron.
Iha parte seluk Xefe Departamentu Logistika e Gestaun de Patrimonio iha Ministerio saúde (DLGP-MS), José Francisco de Oliveira Campos hateten, problema ne’e akontese tanba falta de kordenasaun entre servisu saude distritais no sentral.
“Tanba sentrais iha kupon, bele apoiu ba servisu sentru atu auguenta hodi hein distribuisaun husi kompania rua hanesan Aitula no Eto ne’ebe kontratu husi governu, atu halo distribusaun kombustivel ba sentru saúde no ospital iha teritorio tomak, tanba sistema distribuisaun kada fulan tolu dala ida tuir nesesidade sentru nian hanesan kareta inklui mos jerador,” dehan Xefe DLGP.Campos.
Tuir nia, dalaruma kompania tarde halo distribuisaun kombustivel ba iha Sentru Saude sira, tanba problema pagamentu ne’ebe ladun diak.
“Dala barak kompania sira keixa bei-beik kona ba prosesu pagamentu la’o ladun diak, entaun ami mos labele obriga demais se ema seidauk simu osan,” hateten Xefe Campos.
Sistema distribuisaun kombustivel ba Sentru Saúde no Ospital la hanesan, ba sentru saúde kada fulan tolu ditribui 4 ou 5 mil litru, no ba Ospital 10 to’o 15 mil litru tanba ospital hala’o operasaun durante 24 oras, inklui mos ambulansia “pior liu jerador ospital nian oras ida gasta 49 mil litru,” Xefe Campos esplika.
Iha oportunidade hanesan Diretor Nasional Administrasaun Logistica e Aprovizionamentu MS, Leão Borges rekonese katak, iha duni Sentru Saude iha Distritu balun mak falta kombustivel, maibe sira ne’ebe presiza tebes kombustivel, servisu sentrais fo apoi kupon ne’ebe iha hodi bele auguenta hein distribuisaun husi kompania.
“Ami labele halo buat ida, bainhira kompania sira hato’o sira nia aprezentasaun katak governu halo prosesu pagamentu tarde, entaun distribuisaun mos tenke tarde,” dehan Diretor Borges.*
