Hafoin tuir formasaun durante fulan neen (6) kona ba area ospitalidade no turismu iha Sentru Treinamentu Vocasional Juventude Camea (STVJC), treinadores 42 simu sertifikadu husi Sekretariu Estadu Formasaun Profesional e Empregu (SEFOPE) iha Salaun Enkontru Balide, Dili.
“Hau hanoin formasaun ida ne’e hanesan kualifikasaun nasional ne’ebe hetan akreditasaun husi INDMO, tanba foin primeira vez ami halo graduasaun espesifiku formasaun no avaliasaun iha area ospitalidade, atu fasilita treinadores sira bainhira fo formasaun ba joventude sira ne’ebe presiza iha sira nia sentru rasik,” dehan Koordenador Programa, Arlindo da Silva, iha salaun enkontru SEFOPE, semana kotuk (02/05).
Kordenador da Silva dehan, objetivu husi treinamentu ida ne’e mak, atu hasa’e kapasidade no kuinesementu treinadores sira iha Sentru Formasaun ne’ebe ejiste iha teritorio tomak hodi bele inklui mos membru husi Diresaun Nasional Formasaun Professional (DNAFOP) nune’e bainhira fo formasaun no avaliasaun ba joventude sira tuir estandar internasional.
Iha fatin hanesan Xefe Gabinete SEFOPE, Angelio Rego hateten, iha sentru barak mak bele fo formasaun ba treinadores sira iha area ospitalidade no turismo, maibe SEFOPE hili STVJ Camea, tanba STVJ Camea iha fatin Izolado (do’ok husi movimentu).
Sentru ne’e mos halo ona koperasaun servisu ho sentru treinamentu iha Bali ne’ebe iha kapasidade no kuinesementu iha area Hospitalidade hodi bele forma mos Timor oan ho kualifikado.
“Hau espera katak partisipantes sira labele para ho formasaun no sertifikado ne’ebe iha ona maibe diak liu aproveita fasilidade teknologia ne’ebe iha atu bele aumenta informasaun ne’ebe imi iha ona hodi bele transfere fali ba joventude sira ne’ebe presiza imi nia tulun iha futuru,” nia espera.
Iha oportunidade hanesan, partisipantes Lucas Soares hateten katak formasaun ne’e importante tebes no ajuda treinador sira atu bele forma joventude sira ho kualifikado nune’e mos eqipa tekniku DNAFOP atu halo avaliasaun ba sentru formasaun iha teritorio tomak.
“Ami prontu atu habelar matenek ne’ebe ami iha ba joventude sira ne’ebe presiza sai ema ne’ebe kualifikado hodi beel responde ba ejijensia industria sira nian,” dehan Partisipantes Soares.
