Eletrisidade ne’ebe lakan-mate iha Distritu Oe-Cusse, hamosu lamentasoens husi komunidade sira, tanba jerador ne’ebe fornese ahi ba sira sei foun hela ho kapsidade ne’ebe bo’ot.
“Saida maka la diak tan ona , jerador foun foin aloka mai husi nasional iha Novembru 2011, mina tama be-beik, maibe ahi lakan-mate hela deit, karik falta de manutesaun husi tekniko sira,” lamenta Komunidade Florinda de Fatima Bobo, semana kotuk (24/04) iha Oe-Cusse.
Tuir nia, impaktu husi ahi ne’ebe lakan-mate, halo lampu ampolas sira kotu arbiru no sasan elektronika seluk inklui televizaun.
Tanba ne’e nia parte husu ba EDTL Distritu Oe-Cusse atu resolve tiha, nune’e labele impede servisu publiku nian.
“Ahi lakan mate ne’e kleur ona, kuandu situasaun ne’e kontinua hanesan ne’e, impede servisu publiku nian iha Administrasaun sira tenke paradu,” komunidade Bobo sujere.
Lamentasoens hanesan hato’o mos husi Komunidade Numbei, João Sila katak, problema ahi kontinua lakan mate, tanba falta de rekursu umanus, no governu tenke hare mos ba asuntu ida ne’e.
“Jerador ne’e modernu, maibe rekursu umanu mesak antigu deit, ne’e maka la dun kumpriende kona ba era teknologia moderno nian, entaun Governo tenke kapasita sira no rekruta rekursu umano ne’ebe profesiosional ba area electrika ninian,” Komunidade Sila rekomenda.
Sorin seluk Komunidade husi Sub-distritu Pasabe ne’ebé lakohi fo sai nia naran ba publiku, sente tristi tan deit atu halo trata kartau Border Pas iha edifisiu Registu Sivil e Notariado Distritu Oé-Cusse, lakonsege tanba ahi mate.
“Hau la menta tebes tanba husik servisu no selu osan transporte saugate mai to’o ha kapital la konsege trata kartaun border pass, tan deit eletrisidade la lakan,” Komunidade ne’e lamenta.
Entretantu hatan ba kestaun ne’e Xefi EDTL Distritu Oé-Cusse, Antão Cabal katak, ahi mate tanba jerador foun ne’e hetan avaria iha 23/04 loron kraik to oras ne’e seidauk bele resolve tamba ekipamentu refere uza sistema komputador.
“Ita atu identifika lolos tenke uza komputador li-liu iha digital ne’e sistema komputerisasi, problema ne’e iha loron ne’e kedas hau relata ona ba nasional li-liu parte manutensaun espera katak iha tempu badak bele resolve ona,” Xefe Cabal dehan.
Tuir nia, atu atividade tomak labele paradu, oras dadaun ne’e EDTL Oe-Cusse uza jerador tuan hodi fornese ahi ba komunidade sira maibe ho sistema rotativa.
