“Agora ami diskute hela para loke tan sentru votasaun iha Distritu Baucau iha Caibada, Waimua, no iha Manatuto iha Soibada, tanba iha ita iha 26 partidus politiku ne’ebe sei compete iha eleisaun lejislativu,” hateten Diretor Ezekutivu STAE,Tomas Cabral, semana kotuk, (30/04) iha Kaikoli, Dili.
Tanba ne’e, atu populasaun sira bele ativu liu tan iha eleisaun parlamentar agora, STAE fo oportunidade ba komunidade sira ne’ebe hakarak muda sira nia kartaun eleitoral.
“ Iha data 02 ate 18 Maiu troka kartaun eleitoral ba ema hotu, no ba sira ne’ebe mak hakarak muda hela fatin, no hakarak ba sentru votasaun ne’ebe sira hili para vota besik,” dehan Diretor Cabral.
Iha fatin hanesan Xefe Departementu Public Information STAE, Saturnino EXposto Babo dehan, STAE sei halo preparasaun ne’ebe diak liu tan antes tama ba eleisaun lejislativu ne’e.
“Sei fo treinamentu ba staf sira, liu-liu ba polling staf sira, no fo briefing ba observadores nasional no internasional sira, ba media, no fiskais husi Partidus Politiku sira,” hateten Xefe Babo.
STAE mos sei servisu maka’as liu tan, nune’e eleisaun parlamentar bele la’o ho diak no susesu, Xefe Babo esperansa.
