Tuir Diretor Nasional Formasaun Professional (DNAFOP) iha Sekretario Estadu Formasaun Professional no Emprego (SEFOPE), Albano Salem formasaun baziku kona ba tein nian, konstrusaun, perkantoran, nune’e bele hasa’e sira nia kapasidade no konesementu iha area hirak ne’e.
“Ami nia objetivu mak, atu muda sira nia mentalidade tanba servisu iha kantor tenke iha mentalidade, no fo korajen ba nia atu loke negosio rasik, governu prontu atu fasilita fundu oituan ba partisipantes sira atu harii negosio ki’ik hodi hadia sira nia moris,” dehan Diretor DNAFOP, Salem, semana kotuk (26/04) iha Balide Dili.
Razaun DNAFOP halo planu ida ne’e tanba Dili laran kuaze ke nakonu ho ema Indonezia, tantu halo bakso no ukir, hahu husi Tasitolu to’o iha Becora mesak ema liur deit, Diretor Salem dehan.
Diretor ne’e hatutan, formasaun baziku ho durasaun fulan rua ne’e, atu sukat joven sira nia matenek, maibe karik tempu ne’e la sufsiente, sei prolonga tan tempu, tanba ema sira ne’ebe tuir formasaun ne’e mai husi Distritu sira.
Enkuantu total orsamentu programa ne’e hamutuk US$ 300.000,00
Iha parte seluk Membru Parlamentu Nasional, Deputada Josefa Soares Alvares nia parte apoia inisiativa ida ne’e, maibe importante mak kria kondisoens atu aplika konesementu ne’ebe sira iha.
“Governu tenke apoiu fasilidade no nafatin akompania sira atu bele dezenvolve kuinesementu ou esperiensia ne’ebe formado, sira hetan se fasilita deit formasaun ne’e susar tebes atu halo mudansa,” dehan Deputada Soares.
