“Politka kompania BTK ne’e la los ida. Sira hatama ema Indonesia barak maka servisu iha projeitu ida ne’e. Apaka ita Timoroan la bele ka hau hanoin taka kalen, kramik no seluk ita mos bele. Nusa maka la uza deit ita Timoroan atu nune osan ne’e nakdulas iha rai laran,” hateten Kordenador Caba.
Nia husu ba Governo liu-liu ministerio kompetente atu loke Sentru Formasaun Professional iha area Teknika Carpintaria, Pedreiro, Ferreiro no tekniko seluk hodi bele kaer rasik obras fizika iha future iha enklave Oe-cusse.
‘’Hau husu ba ita nai ulun sira liu-liu kaer Governo ida ne’e loke Sentru Formasaun ba tekniko nian hodi responde ba servisu fiziko sira, hodi nune evita kompania bolu ema husi rai liur mai okupa fali Timoroan nia servisu,” Kordenador ne’e dehan tan.
Entertantu Direktor Obras Publiko Distritu Oe-usse Candido Dos Reis Amaral hateten katak razaun ema estranjerus servisu iha postu integrado Sakato bazea ba kontratu husi kompania tamba obras refere realisa ho sistema tender internasional naran katak sira kumpri kriteria regra iha Timor-Leste.
Hatan ba ezijensia trabalhadoes Timoroan konaba atu hari Sentru Formasaun Professional, Kordenador Secretaria Estado Dezenvolvimento Profesional no Emprego (SEFOPE) Distritu Oe-Cusse, Mario Muni Salu, hateten katak to oras ne’e SEFOPE seidauk Iha politika atu estabelese Sentru Formasaun iha enklave tamba kestaun orsamentu minimu maibe nia espera katak iha futuru bele harii.
Kona ba assuntu refere iha leten mandor ba projeitu Postu Integrado Sacato, Sarjono Resita, la koi fo komentariu tanba hateten la os kompetensia maibe nia esplika katak progresu husi projeitu oras ne’e atinji ona prosentu sia nulu no nia espera katak tama ba fulan Marsu sei enterega obra kompletu ba Governo.
Tuir obervasaun jornalista TDW iha fatin projeitu trabalhadores rai liur maka domina, kompara ho trabalhadores Timoroan maske konstruksaun besik remata ona.
