Deputada Briguida Correia sujere ba meja Parlamentu Nasional atu tau atensaun no foti medidas ba komunidade Suku Gari-Uai, no Berecoli, Subdistritu Baucau Vila, Distritu Baucau, ne’ebe horas ne’e dadauk rame-rame tesi Aikameli arbiru deit hodi fa’an.
“Ohin keisa eskrita ne’ebe mai husi Grupu Juventude nebe mak sira ho vontade rasik, sira kontrola, I sira hare, no akompania problema nebe mosu iha Suku Gari-Uai to’o Berecoli,” hateten Deputada Briguida Correia, iha Plenaria Parlamentu Nasional, semana kotuk (24/1).
Deputada Correia dehan mos katak grupu ida ne’e husu atu tau atensaun no mos halo investigasun ba komunidade sira ne’ebe mak tesi aikameli sei nurak.
“Liu-liu Gari-uai to’o Berecoli tanba ne’e mak sira husu para oinsa mak Governu lalais toma medidas.”
Tuir Briguida katak, Grupu Juventude mos hasai fotografia ba estragus ne’ebe mak komunidade tei ai arburu halo.
TDW konfirma ho komunidades balun hosi area ne’ebe la koi hatoo sira nia identidade katak tebes duni tanba horas ne’e komunidade tesi aikameli nurak sira ne’e tesi mohu hotu ona hodi tetu ba ema ne’ebe mak sosa.
“Loro-loron komunidade sira iha neba ba ba tesi aikameli iha aibubur laran,” hateten komunidade ida hosi Gari-uai nebe la fo sai ninia naran.
Tuir fontes ne’e katak, sira ba tesi lori depois hodi tetu aikameli ne’ebe mak sei nurak kilo ida 75 Centavos no tuan kilo ida $7.
Fontes ne’e husu Governu atu tau atensaun ba situasaun ne’e tanba la kleur aikameli sira ne’e komunidade sira bele tesi mohu ona.
TDW koko konfirma asuntu ne’e ba iha Guarda Florestal, Ministerio Agrigultura no Florestas maibe la konsege tanba Diretur Gurada Florestal, Luis Godinho, la iha fatin atu koalia ho media.
