Tuir Deputadu Francisco Jeronimo hateten Timor-Leste la’os nasaun relijiaun tanba ne’e Estadu fo liberdade ba sidadaun hotu atu tuir relijiaun ne’ebe mak sira hakarak inklui estudante sira ne’ebe halao apredizajen iha eskola privadas sira.
“Horbainhirak ita iha diskusaun bo’ot ida kona ba relijiaun nia iha eskola, ne’e tenki husu mos ba labarik nia vontade, sira hakarak tuir ga la’e, se sira lakoi tuir ne’e direitu sira nian ne’e duni ita labele obriga,” dehan Deutado Francisco Jeronimo, Vise Prezidente Komisaun F Parlamentar, semana kotuk (13/01) iha Parlamentu Nasional, Dili.
Nia dehan, nudar nasaun ne’ebe maka adopta sistema demokrasia, povu hotu-hotu ho livre atu halo saida deit tuir buat nebe mak sira hakarak inklui mos hili relijiaun maibe tuir regras no cumpri ba lei konstitusional.
Nia parte hato’o kestaun ne’e relasiona ho eskola Ann’nur Kampu Alor ne’ebe hanorin estudante ho relijiaun Musulmanu nian (materia relijiaun) enkuantu iha eskola ne’e iha mos estudante husi relijiaun seluk.
Entretantu Diretor Interinu Eskola Sekundariu An’nur, Abrao Vasconcelos hateten eskola ne’e fo livre ba estudante husi relijiaun Katolika, Protestante no seluk tan atu tuir lisaun Islam nian bainihra sira hakarak hatene, oinsa lalaok relijiaun Islam, nomos fo livre ba estudante Islam atu mos tuir religaun Katolika wainhira estudante ne’e hakarak aprende ou comprende relijiaun Katolika.
“Eskola Islam duni maibe kona ba relijiaun ninian ne’e hotu-hotu, relijiaun ne’ebe deit Protestan, Katolik, relijiaun nebe deit sira tuir hanesan bain-bain, la’os dehan relijiaun Islam tama, estudante relijiaun Katolika tenki sai, la’e. Iha ne’e fo livre ba estudante hotu-hotu atu aprende tuir estudante sira nia hakarak,” Diretor Vasconcelos dehan.
Nia hateten, eskola An’nur mos tuir sistema educasaun husi Ministeriu Educasaun katak relijiaun hanorin jeral deit, ne’e duni estudante hotu-hotu bele tuir, maibe kuandu tama liu ba asuntu ne’ebe signifikan liu, estudante husi relijiaun sira seluk sai, depois sira kontinua fali iha lokraik.
