Tuir Prezidenti Konselho Nasional Joventude Timor-Leste (CNTL), Leovigildo da C. Hornai, organizasaun massa joventude, estudante sira, Komite 12 Novembru, governu inklui relijioso hotu buka kordena saida mak sira sei halao ato partisipa iha seriomina hanoin fila hika tinan 20 desde massacre semiterio Santa Cruz iha 1991.
Loron 12 Novembro mos desde independensia Timor-Leste selebra nudar loron Joventude Timor-Leste nian.
Vise Prezidente Komite 12 Novembro, Rogerio Castro, hateten loron ne’e loron Nasional ba Joventude nia esperitu ho nia valor no principiu sira ne’e foti husi masakre 12 de Novembru.
“Hau nia hanoin momentu especial loron ida ne’e bele fo hela fatin, fo hela vida mai ema Timoroan tomak liu-liu foinsa’e hosi ne’ebe deit,” hateten Vise Prezidente Castro.
Nia hatutan aktividade ne’ebe sei halo mak estudante Universidade Nasional Timor LoroSa’e (UNTL) sei halo long march hosi Balibo mai to’o iha igreza Motael Dili, desportu no artista Timor oan sei lomba kanta durante long march 12 de Novembru nian no sei hala’o missa no mos tuir plano sei hasa’e bandeira iha loron ne’e.
“Hau mos husu ba ema hot-hotu liu-liu joven feto ka mane atu hametin honra ba ita nia matebian sira katak iha altura ne’ebe la bele hirus malu, iha loron ida ne’e mos joven sira la bele lanu no mos labele halo violensia ba buat sira ne’e.”
Entretantu, Presidente Komisaun H, Parlamentu Nasional, Antonio Cardoso, hateten katak iha loron 12 Novembru ema hotu tenki fo konsiderasaun ba komemorasaun ba loron ne’e tanba loron ne’e mak komanda joven sira hodi halo ita sai ukun a’an.
“Hau nia hanoin ita tenki kuda nafatin espiritu nasionalista ho patriotista ne’e ba oin hodi bele kopera, bele kolabora, bele integra iha organizasaun Estadu ou bele iha instituisaun, atu nune’e bele fortifika ita nia istoria, no ita nia politika no ita nia programa,” hateten Deputado Cardoso.
Iha parte seluk komunidade Taibesi Arlindo Fajundo Soares hateten loron ne’e importante ba joventude no foinsa’e sira Timoroan hotu tanba liu hosi loron ne’e mak mundo tomak hatene katak Timor hakarak ukun a’an.
“Hau hakarak dehan loron ne’e halo ita tau importansia ba loron ne’e hodi bele halo reflesaun fila-fila ba Timoroan ne’ebe fo sira nia aan ba mate hodi kontra invasaun Indonesia.”
