Atu fasilita labarik sira hodi komprende lisaun ne’ebe sira hetan husi mestre iha prosesu aprendezagenm, Ministeriu Edukasaun lansa promosaun Edukasaun multilingua iha salaun SKB Vila Verde, semana kotuk (10/10).
Hafoin lansamentu, Agustinho Caet nudar asesor lingua iha Ministeriu Edukasaun hateten lansamentu ba rede promosaun Edukasaun multilingual (REPETE 13) sei lansa iha tinan oin mai iha Distritu Oecussi, Manatuto no Lospalos (Lauten).
“Iha Oecussi kuaze 90 pursentu maka uza sira nia lian Baikenu hodi komunika ba malu, Lauten mos hanesan maioria povu uza lian Fataluku no iha Manatuto sira iha komitmentu bo’ot no implementa lian inan maibe, seidauk iha konhesimentu husi Ministeriu Edukasaun,” hateten Assessor Caet.
Entretanto Sindikatu Professores Timor-Leste (SPTL) exige ba Ministeriu da Edukasaun atu halo estuda viabilidade antes implementa programa iha base.
Porta voz SPTL, Agustino Soares, hateten implementasaun lingua maternal ka lia inan iha prosesu aprendizagem la ajuda dezenvolvimentu sector edukasaun iha nasaun laran.
“Politika Ministeriu Edukasaun atu implementa lian materna iha eskola hotu ne’e politika foer, tanba la desenvolve prosesu desenvolvimentu seitor edukasau iha Timor-Leste. Implementasaun lian maternal iha eskola bazikas iha mos posibilidade atu mosu sukuismu ka rasismu iha ita nia rai,” hateten Portavoz Soares.
Nune’e mos estudante universitariu, Lucas Mendonça, hateten implementasaun lian maternal iha eskola bazikas iha territorio iha prosesu aprendizagem bele difikulta labarik sira nia futuru.
“Labarik iha eskola bazika simu lisaun no mestre fo lisaun ho lian materna ida ne’e ladun diak. Tanba, bainhira sira tama ba Universidade sira sei hasoru difikuldade atu uza lian oficiais,” fo hanoin estudante Mendonça.
