Governu liu husi Vise Primeiru Ministru no Vise Ministru Finansas hatama proposta Orsamentu Jeral Estadu (OJE) 2012 nian ho montante US$ 1.763,4 biliaun ba Parlamentu Nasional (PN).
Vise Primeiru Ministru (VPM) Jose Luis Guterres hateten total OJE 2012 nian ne’ebé ohin hatama ba PN ne’e hamutuk US$ 1.763,4 e bainhira debate iha Parlamentu bele iha mudansa.
“Ami mai iha ne’e lori governu nia naran entrega proposta OJE ba tinan oin mai ne’ebé propoin US$ 1.763,4 biliaun, e iha tinan ida ne’e ita tau osan barak liu ba iha fundu capital dezenvolvementu husi orsamentu ne’e,”hateten VPM Guterres semana kotuk (30/09) hafoin entrega proposta OJE 2012 ba Prezidente Parlamentu Fernando Lasama de Araujo iha PN.
Entretantu tuir Vise Ministru Finansas (VMF) Rui Hanjan katak iha capital dezenvolvementu iha fundu infraestrutura, fundu capital no mos orsamentu ba kontinuasaun projetu Pakote Dezenvolvementu Desentralizadu (PDD) ho Pakote Dezenvolvementu Lokal (PDL) ne’ebé tama hotu iha ne’e.
“Ha’u bele hateten katak, husi montante orsamentu ne’e salariu ho vensimentu ninian iha US$ 140.1 miloens ne’ebé sa’e husi orsamentu uluk tanba iha impaktu barak no mudansa barak ne’ebé akontese dadauk ne’e,”Hanjan dehan.
Hanjan hatutan, orsamentu ba bens ervisus ninian hamutuk 344.7 miloens dolares Amerikanu.
“Liu-liu ita hare kona-ba bens servisu ninian ne’e bo’ot liu mak US$ 87 miloens ba jerador ne’ebé mak mai foun ne’e ,ita tenki ser preve ona kuandu funsionamentu ahi 28 de Novembru tenki lakan ,entaun tau orsamentu ba kombustivel ninian,”nia katak.
Alende ne’e iha mos orsamentu ba preparasaun eleisaun 2012 nian pur volta US$ 14.5 miloens hodi hala’o ba eleisaun Prezidenti no Parlamentu ninian.
Depois US$ 4 miloens ba selebrasaun tolu ninian ,ida mak selebrasaun tinan 100 ba Dom Boa Ventura ninian, selebrasaun tinan 500 Portugues to’o iha Timor,inklui selebrasaun tinan 10 restaurasaun independensia ninian.
Nia hato’o tan katak, iha mos transferensias orsamentu ho montante US$ 194.2 fahe ba kategoria ida hanesan US$ 69.9 ba veteranus ninian .
“Iha mos US$ 32.1 miliaun ne’ebé mak sei kontinua selu ba ferik katuas sira ne’ebé mak tinan 60 ba leten labele ona servisu ,sira tenki ser atu hetan subsidiu ida ne’e para bele asegura sira nia moris, “nia dehan.
Nia hatutan, US$ 6.5 miloens sei halo kontinuasaun ba programa PDL ninian iha Ministeriu Administrasaun Estatal ninian kona-ba programa desentralizasaun ninian.
“Iha mos US$ 20 miloens atu kria kampu trabalhu ba ita nia joven sira ,ho tan US$ 3.5 miloens ne’ebé atu asegura lei pensaun nian karik aprova iha Parlamentu depois promulga husi Prezidenti da Republika nune’e bele selu sira nia pensaun”Rui hato’o.
Alende ne’e Prezidenti Parlamentu Fernando Lasama de Araujo hateten ,orsamentu 2012 nian tama ona iha PN, hanesan bai-bain sei diskute iha PN no sei baixa iha komisaun sira iha semana oin mai nune’e komisaun bele hare orsamentu ne’e ba kada ministeriu.
“Ne’e proposta governu nian.Komesa iha 15 Outubru to’o fin de Novembru ami sei hare no sei asesu ba debate OJE ne’e nune’e publiku bele hatene,”Lasama dehan.
Tuir Lasama, OJE 2012 ne’e hamutuk biliaun ida ba capital dezenvolvementu, maibé governu tenke lori dezenu hatudu iha Parlamentu.
“ha’u husu ona governu ida capital dezenvolvementu ne’e tenke lori dezenu mai para osan ne’e ba halo tuir dezenu ne’ebé iha,”nia tenik.
