Tuir planu Partidu Congresu Nasional Rekonstrusaun Timor (CNRT) sei publika sira nia kandidatura ba prezidente nian iha konferensia partidu nian iha Janeiru 2012.
“Agora ami seidauk desidi semak sei kandidata aan ba iha eleisaun prezidensial nian maibe iha Janeiru 2012 bainhira halo konferensia partidu nian e iha ne’e mak ami foin desidi kandidatu ba Prezidente da Republika,”hateten Deputadu Arao Noe husi bankada CNRT semana kotuk (27/09) iha Uma Fukun,Dili.
Tuir nia, iha konferensia ne’e sei desidi mos kona-ba halo koaligasaun, “karik iha eleisaun 2012 mak partidu CNRT la manan,atu halo koaligasaun ou la’e depende iha konferensia ne’e mak sei desidi,”.
Entertantu tuir Deputadu Natalino dos Santos katak, CNRT nia pozisaun politika baze estrutura mak sei define iha konferensial iha Janeiru.
“Partidu CNRT iha figura barak mak bele kandidata aan maibe desizaun ikus mai husi konferensia nasional, “nia afirma.
Entretantu kandidatu seluk ne’ebe sei kandidata aan iha eleisaun presidensial 2012 ne’ebe publiku hatene ona mak hanesan Komandante Jeral Falintil FDTL, Taur Matan Ruak, Angela Freitas husi partidu Trabalhista, Fernando Lasama de Araujo.
