Ministru Saude (MS) Nelson Martins hateten statute funsiunariu Servisu Autonomia Medikamentus e Ekipamentus de Saude (SAMES) oras ne’e dadaun iha ona Konsellu Ministru (KM) atu halo diskusaun.
Ministru Nelson hato’o kestaun ne’e relasiona ho ejizensia husi funsiunariu SAMES nian kona-ba sira nia statute ne’ebe to’o agora seidauk klaru.
“Sim, agora ami organiza hela aprezentasaun iha Konsellu Ministru e ami sei halo diskusaun kona-ba sira nia ejizensia tanba ita hatene katak sira halo knar halo distribuisaun aimoruk ba 13 distritu ba ospital, sentru saude sir abele uza hodi atende pasiente sira,”informa Minstru Nelson Martins semana kotuk iha Kaikoli,Dili.
Tanba ne’e husu ba funsiunariu sira iha SAMES atu kalma “ita sei resolve neneik-neneik.”
Kona-ba estatutu SAMES, oras ne’e dadaun SAMES iha faze preparasaun atu sai empreza publiku, tanba ba funsiunariu sira ne’ebe servisu iha SAMES sei regula iha nia statute rasik e MS monta ona Diretor Jeral no Konsellu Administarsaun hodi kria regulamentu kona-ba statute SAMES nian.
“Tanba ne’e ami sei halo reuniaun ida ho SAMES hodi diskute kona-ba sira nia statute, oinsa mak bele hadia sistema SAMES nia diak liutan e husu ba funsiunariu sira atu pasiensia oituan tanba ita sei prepara hela, hau hatene katak ita boot sira servisu durante tinan 10 ona,” nia rekonese.
Alende ne’e funsiunariu SAMES ne’ebe sei kontratadu husu mos ba MS atu muda sira nia statute sai funsiunariu publiku.
Entretantu porta voz SAMES, Bruno Tavares hateten nia parte konsidera governu halo diskriminasaun ba sira tanba funsiunariu balun servisu iha SAMES liu ona tinan 10 maibe governu seidauk rekonese to’o ohin loron.
“Ita hatene katak ami servisu durante tinan 10 ona no ami servisu ho dedikasaun tomak hodi kontribui ba povu no nasaun ida ne’e liu husi aimoruk ne’ebe distribui durante ne’e ba ospital no sentru saude tomak iha Timor-leste, tanba ne’e mak ami husu ba estadu RDTL atu define klaru ami nia statute,”Bruno husu.
Bruno hatutan,bazea ba rezolusaun ne’ebe governu fo sai iha 17 Novembro ho numeru 44/2011,koalia kona-ba konversaun funsionariu kontratadu ka temporario sei hetan legalidade sai funsionario permanente. “E foin lalais ne’e funsionariu Miniteriu Saude barak mak simu kargo foun,so uniku funsiunariu SAMES la hetan titlu funsionariu kontratadu sai permanente,” nia preokupa.
