Reprezentante Grupu Kultiva Bafo-Kayrala iha Postu-Admistrativu Lautem Munisipiu Lautem Baltazar da Costa dehan, apela ba Governu tenke kria merkadu ba produtu bafo kayrala hodi motiva grupu kultivu sira hodi aumenta produsaun.
Durante ne’e sira produtu Bafo-Kayrala ne’ebé sira kultiva ne’e rezultadu kolleta di’ak tebes, maibé laiha merkadu ba sira atu asesu no sira utiliza de’it ba konsumu kada loron no fahe ba ema sira ne’ebé presiza.
“Ami husu governu liuhusi Sekretáriu ba Sekretariadu Kooperativa (Secoop) atu kria merkadu ba Bafo-Kayrala,” nia hatete.
Nia dehan, dadaun ne’e sira-nia grupu, kuda ona Bafo-Kayrala hamutuk hektar ualu (8), maibé iha hektar 2 mak hetan estragus tiha husi karau no hela hektar 6 de’it, maibé sira kontinua aumenta nia produsaun, tanba governu promete ona atu lori ba iha merkadu.
“Ami presiza tebes merkadu ba ami-nia produtu, nune’e bele hetan osan hodi sustenta ami-nia família nomós kontinua motiva ami hodi hasa’e ami-nia produsaun Bafo-Kayrala,” Reprezentante Grupu Kultiva Bafo-Kayrala Costa informa.
Alende ne’e nia husu governu atu apoiu mákina dulas nian hodi fasilita sira-nia servisu produsaun.
Entretantu, Sekretáriu SECoop Arsénio Pereira da Silva hatete, iha kooperativa multi-sektorál ne’ebé prontu atu akumula no sosa produtu agríkola komunidade nian, liu-liu Bafo Kayrala hodi responde ba preokupasaun produtór sira-nia kona-ba merkadu ba sira-nia produtu.
“Governu ita la mai kuda diretamente, maibé governu nia papel mak buka merkadu ba produtór sira. Ho inisiativa ida-ne’e, komunidade sira bele iha konfiansa atu kontinua produz tanba iha garantia katak sira nia produtu sei hetan merkadu,” nia hatete.
Nia hatete, Bafo Kayrala iha valór ekonómiku aas, tanba bele uza hanesan matéria-prima ba indústria, panifikasaun, alimentasaun animal no programa merenda eskolár. Tanba tuir orientasaun governu nian, produtu ida-ne’e mós sei integra ba programa merenda eskolár iha futuru.
“Ita halo ona lansamentu sosa Bafo Kayrala iha nível nasionál hodi fó pasu importante ida atu fortalese setór agríkola, garante merkadu ba produtór sira no promove dezenvolvimentu ekonomia lokal iha munisípiu,” nia hatete.
Iha parte seluk, Prezidente Kooperativa 3K-T, Idelfonso Pinto, husu ba produtór sira atu kontinua aumenta kualidade no kuantidade produsaun, tanba kooperativa sei sosa Bafo Kayrala ho presu US$0.40 sentavus ba kada kilograma.
“Ba dahuluk ita sei sosa to’o 120 tonelada Bafo Kayrala hodi fornese ba merenda eskolar nune’e mós ba uma-mahon sira,” nia salienta. Nia hatete, kooperativa sira sosa ne’e mós hodi fó oportunidade bo’ot ba komunidade sira atu aumenta rendimentu no dezenvolve atividade agríkola nian liu-liu Bafo-Kayrala.
