Diretur Nasional Farmasia no Medikamentus Ministerio da Saude (MS), Delfim da Costa Xavier hateten Timor-Leste seidauk iha baze legal proprio hodi regula produsaun no utilizasaun aimoruk tradisional sira iha rai laran, maibe politika saúde oitavu governu iha komitmentu atu promove aimoruk tradisional ba tratamentu moras.
Nia dehan dadaun ne’e MS dezenvolve hela esbosu lei balun kona ba politika medikamentus, utilizasaun aimoruk kontrabandu, inklui narkotika, no aimoruk tradisional sira, ne’ebe sei aprezenta ba konselho ministrus hodi hetan aprovasaun iha fin do tinan 2019.
“To’o agora ita seidauk halo registu ba aimoruk tradisional sira ne’ebe eziste iha rai laran no realidade hatudu maluk sira ne’ebe iha abilidade halo hela aimoruk sira ne’e no komunidade utiliza hela. Ita sei la bandu, maibe ita sei kontrola hodi garante aimoruk sira ne’e iha kualidade no tuir padraun kualidade OMS nian. Ho ida ne’e maka ita bele proteje saúde publika povu nian,” nia hateten iha Kaikoli, Dili.
Nia dehan aimoruk tradisional, signifika mai husi natureza proprio hanesan ai-abut, ai-kulit, ai-tahan, ai-fuan, bele mos mai husi tasi, ne’ebe prepara tradisionalmente laiha kontaminasaun ho substansia kimiku.
Entertantu, Reprezentante Organizasaun Mundial da Saude (OMS), doutor Rajesh Pandav hateten nasaun barak iha mundu utiliza aimoruk tradisional ba tratamentu tanba diak, maibe tenke regulariza no halo estudu ida ne’ebe klean kona ba material baziku no konaba utilizasaun sira.
Nia dehan atu promove aimoruk tradisional, tenke iha lei kona ba aimoruk tradisional, politika utilizasaun no garante nia kualidade atu labele prejudika ema nia saúde bainhira utiliza.
“Timor-Leste seidauk iha politika ida kona ba aimoruk tradisional, maibe governu hakarak dezenvolve politika ne’e, no OMS prontu atu supporta dezenvolve,” nia hateten.
Nia informa nasaun ne’ebe utiliza aimoruk tradisional famosu liu maka, nasaun India no sira iha departamentu ida ne’ebe ketak hodi hare kona ba aimoruk tradicional. Nune’e mos nasaun seluk hanesan Thailandia, China no seluk tan iha utilizasaun a’as ba aimoruk tradicional.
