Maioria populasuan sira iha Dili laran, dadersan deit ba hein ona iha sentru votasaun hodi ezerse sira nia direitu ne’ebe garante ona iha Konstituisaun da Republika Timor-Leste (RDTL).
Idalina Ximenes, komunidade Luru-Mata, Fatuhada hateten dadersan deit nia ho nia familia sira lori malu ba iha sentru votasaun hodi tuir votasaun.
“Hau la tauk, tanba ita toman ona ho situasuan ida hatauk malu ne’e, dehan hanesan ne’e hanesan ne’eba,” nia hateten hafoin vota, iha sentru votasuan eskola 10 Dezembru, Fatuhada, Dili.
Nia hateten, nia husik hela nia oan (sei bebe) iha uma hodi mai tuir votasuan, tanba ida ne’e importante tebes ba nia hodi hili partidu ne’ebe iha programa diak ba povu no rai doben Timor-Leste.
Maibe, nia husu ba partidu se deit maka manan, tenke tau matan ba povu nia nesesidade baziku sira ne’ebe durante ne’e sai preokupasaun ba publiku.
“Tenke haree povu diak, dalan ne’ebe maka aat tenke hadia, bee moos tenke to’o iha komunidade sira nia uma, ahi no sel-seluk tan,” nia husu.
Sentidu hanesan hato’o mos husi Alexandrina de Jesus, katak nia parte la tauk bainhira iha sentru votasaun hodi tuir votasuan.
“Agora povu matenek, husik lider sira han malu, trata malu, importante mak ita nudar povu, ita tenke hamutuk hametin unidade,” nia hateten.
Nia husu, mos ba partidus ne’ebe manan tenke ukun povu ho diak, muda povu nia moris. “Hanesan bee moos, estrada, sentru saude sira ne’e tenke kondisaun,” nia sujere.
Portantu joven Roy Guterres, husu ba lider partidu politiku sira atu hametin unidade nasional, tanba Timor-Leste presiza tebes ida ne’e.
“Iha unidade mak ita foin bele halo dezenvolvementu iha nasaun ida ne’e,ne’ebe unidade ne’e importante, liu-liu ba lideransa sira inklui militante partidus ne’ebe durante ne’e insulta malu,” nia hateten.
Alende ne’e, nia mos husu ba partidus ne’ebe manan atu tau matan mos ba foinsa’e sira, liu-liu sira ne’ebe sei dezempregu hela.
“Kria kampu servisu, loke kursu sira hodi sir abele kapasita sira nia aan e alende ne’e bele mos minimize konflitu,” nia hateten.
Nia mos husu ba partidu sira ne’ebe lakon iha elisaun ida ne’e, atu mantein kalma, hakmatek no fo kontribuisaun diak ba sira ne’ebe mak manan votu Povu nian ba lidera dezenvolvimentu ne’ebe diak liu iha futuru.
