Conselho Nasional Jo-ventude Timor-Leste (CNJTL), husu ba joventude sira atu labele monu ba lasu partidu politiku sira nian, tanba sira aproveita deit jovens, liu-liu iha tempu kampanha ba sira nia interese partidaria.
Gestor Forum Komunikasaun Joventude (FKJ) João do Nascimento hateten foinsa’e sira ne’ebe involve iha vida politika, sira nia konesementu tenke klean kona ba partidu.
“Muda sira nia pensamentu, sira nia hahalok ou atitude sira, labele radikalismu liu,” nia hateten, iha Dili.
Tanba, tuir nia joventude barak mak involve aan iha partidus politiku seidauk iha konesementu ne’ebe klean kona ba politiku ne’e rasik e partidu ne’e rasik mos laiha kadernizasaun.
“Ita nia joven sira la hatene oinsa lala’ok husi partido nian, ida ne’e mak sai frakeza bo’ot ba ita nia joventude,” nia hateten.
Nia dehan, joven mak dezenvolve rai ida ne’e, la’os joven sai fali eskada ba grupu ou ema ida nian hodi atinji sira nia objetivu.
“Joven labele monu ba lasu politiku nain sira,”nia dehan.
Nia mos, husu ba partidu politiku sira atu haklean tan sira nia informasaun kona partidu nian ba joven sira, atu nune’e sira iha konesementu no la fasil ba sira hodi sai objetu ba politiku nain sira.
Iha parte seluk Sekretario Estado Joventude e Trabalhador (SEJT) Nivio Magalhães, hateten joventude tenke hatene atu mantein disiplina no tenke kontribui ba paz no estabilidade iha rai laran.
“Joventude tenke iha unidade maske partidu diferente, tanba future nasaun ida ne’e iha imi nia liman,” nia hateten.
Entretantu Joventude Januario Pereira hateten joventude tenke iha konesementu kona ba edukasaun sivika sidadania no tenke iha responsabilidade ba nasaun ida ne’e.
“Ita tenke hatudu ita nia kualidade iha hanoin, edukasaun no iha vida politika, la’os naran involve deit iha partidu,” nia dehan.
