Governu liu husi Ministeriu Edukasaun kontinua fo subsidiu ba dosente husi universidade privadu sira kona ba formasuan lian Portugues hodi hasa’e liu tan sira nia kapasidade iha lian Portugues.
Diretor Jeral husi Ministeriu Edukasaun (ME), Antoninho Pirez hateten formasaun ba lian Portugues importante tebes tanba alende lian Tetun, Portugues mos sai lian ofisial iha Timor-Leste ne’ebe uza mos hanorin iha eskola sira inklui iha universidade.
“Fo hela subsidiu ba universidade privadu sira, liu husi transferensia publiku hodi fo formasaun ba dosente sira iha area ne’ebe iha, hadia sira nia konesementu iha area espesifiku sira,” nia hateten, iha Dili.
Nia hatutan, subsidiu ne’e ba universidade hotu ne’ebe hetan ona akreditasaun husi governu, enkauntu ba sira ne’ebe seidauk, sira la hetan subsidiu.
Entretantu Reitor Universidade Dili (UNDIL), Estevão da Costa Belo rekonese katak sira mos hetan subsidiu husi Ministeriu Edukasaun kona ba formasaun lian Portugues ba iha dosente sira iha kedas kintu governu konstitusional.
“Maibe subsidiu ne’e ki’ik liu e formasaun durante fulan tolu deit, ne’e atu aprende oinsa , formasuan ne’e to’o tinan ida ba leten nune’e sir abele hatene ho didiak,” nia hateten.
Nia hateten, dosente barak mak la komprende lian Portugues tanba maioria dosentes ne’ebe hanorin iha UNDIL ne’e hasai lisensiatura iha Indonezia nia tempu.
“Ami nia dosente sira ne’e balun foti mestrado, balun lisensiatura, maibe sira bahasa Indonesia mak maka’as liu duke lian Portugues,” nia hateten.
Iha parte seluk Sekretario Nasional rede edukasaun Timor-Leste Coalition for Education (TLCE), Jose Monteiro hateten ne’e inisiativa diak ida husi governu atu promove diak liu tan lian Portugues iha eskola sira inklui iha universidades.
Atu apoia politika nasional edukasaun nian hodi atinje kualidade edukasaun, nia dehan pelu menus investe ba formasaun professores no dosentesira iha lian Portgues.
“Ita iha konfuzaun bo’ot iha lingua, ita aprende mas ita nunka adapta lingua ida ne’e. Iha konstituisaun RDTL artigu 5 Lei Baziku Edukasaun nian katak iha prosesu aprendizajen tenke uza lingua Portugues sai lingua siensia no aprendizajen ,” nia hateten.
