Pasientes urologia (moras fatuk iha rins, soe be ki’ik no bo’ot ladiak) la konsege halo konsulta iha Ospital Nasional Guido Valadares (HNV), tanba mediku espesialista iha hela lisensa annual ba Cina.
Pasiente Rui Pinto, husi munisipio Viqueque lamentavel ho prosesu ne’e, tanba sira vizita ospital dala rua ona no professional sira hateten mediku laiha sem iha esplikasaun ida klaru.
Nia konsidera, nia moras ne’e urjente no fulan ida ona mii ran no sente moras maka’as, tanba ne’e presiza hetan intervensaun imediata.
“Ami husu ba Ministerio Saude, sebele karik tau doutor espesialista ne’e tolu ka hat bele troka malu hodi atende pasiente, nune’e labele prejudika pasiente tanba moras ida mi ladiak ne’e grave,” nia hateten iha Ospital
Nasional Bidau, Dili.
Nia lamenta, tanba dader tuku 5:30 sira tenke forma ona linha hodi hein funsionario sira loke odamatan fahe numeru registu, tanba kuandu tarde tuku 9 dader ba leten, entaun tenke adia fali ba loron tuir mai.
Tuir observasaun Jornalista TDW nian iha terenu, haree katak foin lalais governu lansa ona ba utilizasaun registu elektronika iha HNGV, maibe pasiente sira sei nafatin halo registu manual.
Entretantu, Xefe Unidade Out Patient Departament (OPD) Helder Guterres hateten Timor –Leste seidauk iha espesialista ba urologia, maibe iha espesialista Cineza ida no Cubanu ida mak halo hela tratamentu durante ne’e(iha
hela lisensa annual).
“Iha ne’e, iha mediku espesialista rua; husi Cuba no Cina ne’ebe pasiente foun ami refere ba mediku Cuba ba sira ne’ebe kontinuasaun tratamentu liu –liu antes ne’e halo ona tratamentu iha mediku Cineza ne’e tenke hein,” nia
hateten.
Nia rekonese, sira la pasa informasaun antes ba iha pasientes kona ba mediku iha hela lisensa, tanba ne’e pasiente sira hein kleur lakon pasensia entau halo asaun protesta hasoru professional sira.
Nia garantia, mediku Cineza ne’e sei to’o iha loron Kinta -feira (3-08) no sei kontinua fali servisu halo tratamentu ba pasiente sira iha loron Kinta dia 10 semana ne’e.
