Orador iha seminario ho tema “Foinsa’e harii Dame”, Fernando Antonio da Costa hateten involvimentu joventude iha prosesu dezenvolvimentu iha progresu diak, maibe responsabilidade sei menus.
Nia dehan, dala barak joven sira iha ideias positive no furak, maibe bainhira simu responsabilidade atu implementa ideias sira ne’e lakonsege.
Nia dezafia, joven sira atu inisia ideias positive ruma tenke responsabilija hodi halo asaun tau iha pratika tanba joven barak iha kapasidade, la’os inisia deit depois adulto sira mak responsabiliza lori joven nian naran.
“Hau nunka aseita ema dehan joven laiha kapasidade, tanba esperiensia servisu hamutuk ho sira balun halo konsultasaun ba politika nasional joventude iha munisipio hotu sira mak organiza no sira mak halo buat hotu,” nia
hateten, iha Delta Nova.
Realidade akontese, nia dehan ema barak iha ideias maibe bainhira fo responsabilidade, sira lakohi atu hala’o.
Nia dehan, realidade iha konselho sukus fo oportunidade ba joven sira (reprezentante joventude), maske ema hirak ne’e maioria la’os idade joventude, maibe sira tuur iha ne’eba servisu ba joven sira.
Entretantu, Alumni Parlamentu Foinsa’e Timor –Leste (APFTL) Zaulino Gomes da Silva, rekonese katak joven balun laiha responsabilidade, maibe la’os joven hotu-hotu.
Maske seidauk iha estudu ida kona ba ida ne’e, maibe iha nia observasaun en jeral akontese duni, bainhira hetan oportunidade ruma, lakohi asume responsabilidade.
“Hau hanoin, joven sira tenke minimize ona koalia barak maibe tenke assume ona responsabilidade sira,” nia enkoraja.
Tanba tuir nia, atu hetan konfiansa ne’e la fasil no presiza tempu,entaun tenke fo responsabilidade tomak ba iha oportunidade ka konfiansa ne’ebe hetan hodi dezenvolve aan diak liu tan no kontribui ba nasaun.
Nia mos, husu joven sira ne’ebe iha ideias konstrutivu tenke hateten sai ideias sira ne’e ho responsabilidade no foti asaun hodi kontribui ba iha mudansa sira iha rai laran.
