Organizasaun International World Vision Timor –Leste (WVTL) iha programa prioridade hat hanesan edukasaun, saude, ekonomia e dezenvolvimentu no jeneru mak implementa hela iha munisipio Baucau, Aileu no Bobonaro.
Deputy Country Director WVTL, Jose da Costa hateten Timor –Leste hanesan nasaun ne’ebe sub-dezenvolvidu entaun programa hat ne’e refleta tebes ba iha kondisaun moris povu nian.
Husi programa hirak ne’e, nia dehan programa ne’ebe hetan konsentrasaun maka’as mak saude liga ba bee moos nian, tanba komunidades barak tantu iha nasional no rural seidauk asesu ba bee moos ne’ebe adekuadu.
“Setor saude mak maior programa ne’ebe ami hala’o tanba kestaun bee moos ne’e fundamental ne’ebe liga ho saude nian,” nia hateten iha knar fatin Bidau, Dili.
“Ita labele koalia saude diak, se ita laiha bee moos.”
Tuir nia, lolos la’os bee mak laiha maibe ekipa servisu kontrolu ba bee moos mak seidauk konsege halo servisu ho diak.
Alende kontrolu, nia dehan iha mos problema seluk mak mentalidade komunidade nian rasik ne’ebe utilize bee moos la ho disiplina no responsabilidade.
Nia hateten, servisu kanalizasaun bee moos ba komunidade sira iha nivel munisipio kuaze halo husi orgnaizasaun non-governmental no agensia internasional sira, tuir kapasidade organizasaun sira nian atu dada bee ba komunidade.
Iha mos obstaklu ne’ebe organizasaun sira hasoru mak, nia dehan situasuan geografia, komunidade barak hela iha foho leten susar atu dada bee ba sira, maibe nafatin esforsu atu dada bee to’o iha nivel suku.
“Kualidade bee moos ita presiza haree, governu liu –liu SAS tenke halo estudu ida klean tanba moras sira hanesan diarea no seluk tan impaktu husi bee moos,” nia hateten.
Nia informa, durante servisu hamutuk ho komunidade sira kona ba dezenvolvimentu bee moos haree katak kauza bee matan sira iha Timor-Leste laiha kontrolu (protesaun) ida ne’ebe diak.
Nia informa, WVTL supporta mak halo mobilizasaun ba komunidade, fo kapasitasaun ba grupos, apoia material no akompanha komunidades hodi halo kanalizasaun no dada bee moos ba iha bairo, atu komunidade sira bele asesu besik husi sira nia hela fatin.
Iha parte seluk, Prezidente Komisaun E (infra-estrukturas, transportes e komunikasaun), Manuel Castro konsidera bee moos sai problema ne’ebe kompleksu tebes durante ne’e.
Nia dehan, kompleksu tanba iha fator oi-oin hanesan menus rekursus humanus atu kontrolu, orsamentu la sufsiente no atitude komunidade nian ne’ebe la kontribui atu kuida bee moos.
“Ita investe maka’as iha sanitasaun, ita sei poupa buat barak hanesan moras ita sei hatuun, hadia status saude ba labarik sira maibe depende ba orsamentu,” nia hateten.
Nia hatutan, oras ne’e dadaun governu ho apoiu husi ekipa agua e saneamentu Portugal halo hela estudu ida kona ba sistema bee moos iha TL atu bele buka mekanismu hodi rezolve problema refere.
Nia mos, sujere ba governu foun mai atu entrega sistema bee moos no eletrisidade ba iha seitor privado atu jere atu bele aseguru kontrolu no funsionamentu ne’ebe diak.
