Pasiente Cansio das Neves, lamenta ho sistema arkivu iha Ospital Nasional Guido Valadares (HNGV) ne’ebe la organizado halo dokumentu pasiente nian liu–liu dokumentu diagnostiku no status ka istorial moras nian lakon.
Nia sente preokupadu, ho sistema jestaun atendimentu iha HNGV, tanba kada loron pasiente sempre hein oras ba oras hodi funsionario sira buka sira nia dokumentu atu ba hasoru fali mediku espesialista sira tuir nesesidade.
Nia dehan, problema ne’e akontese tanba dokumentus sira ne’e ladun rai didiak entaun dokumentu barak susar atu buka bainhira pasientes presiza atu hatudu ba espesialista sira hodi halo check-up ba sira nia kondisaun.
“Sistema arkivu ne’e hau haree komplikadu oituan, se arkiva diak entaun buka mos fasil, se ladiak buka mos araska,” nia hateten, iha Ospital Nasioanl Bidau, Dili.
Alende ne’e, nia dehan atendimentu ba registu naran mos sai problema tanba pasiente sira sempre forma iha linha, dudu malu hodi hetan numeru atu halo registu no apoitmentu ho mediku espesialista sira.
“Ita moras mai mak ita hein hanesan ne’e, ita nia kondisaun sai pior liu tan deit,” nia proekupa.
Lamentasoens hanesan mai mos husi pasiente konfirmadu ne’ebe lakohi publika nia naran, tanba sira iha apoitmentu ho mediku espesialista iha loron ne’e, maibe tenke hein oras 3 nia laran e official sira la konsege buka hetan dokumentu estatu mediku.
“Ami ba deit iha mediku sira nia fatin, sira haruka ami fila tanba sira presiza estatu moras nian hodi haree no halo komparasaun hodi pasa tuir reseita no intervensaun saida mak presiza halo,” nia hateten.
Hatan ba kestaun ne’e, Xefe Gabinete Kontrolu Kualidade e Komunikasaun HNGV, Paulina Pinto rekonese sempre mosu dezentendementu entre pasiente ho official medical record sira, tanba sei uza sistema manual.
Nia dehan, problema ne’e mosu la’os deit parte HNGV mak sala, maibe dala ruma pasiente lori sira nia dokumentu ba uma no haluhan lori mai fali atu hasoru mediku sira hodi halo check-up ba sira nia saude.
“Dadaun ne’e ami uza hela sistema manual, maibe iha planu governu nian ne’ebe atu lansa sistema dijitalizasaun iha tempu badak,” nia hateten.
Nia informa, fatin ba iha medical record foin halo rehabilitasaun no dokumentus ne’e tenke muda husi fatin ida ba fatin seluk, maibe sira sei esforsu atu hadia sistema ida ne’e.
Nia hatutan, tinan ne’e sira iha ona folder espesifiku ida hodi hari dokumentu kada pasiente sira nian, maibe problema mak espasu atu rai dokumentu sira ne’e.
