Eulalia Maria de Jesus, inan ho problema iha nia ovariu husi munisipiu Manufahi ne’ebe la konsege hasoru mediku no pesoal saude iha Ospital Nasional Guido Valadares haruka fila tanba deit inan ne’e la lori livru konsulta nian.
Situasaun ida ne’e, halo pasiente sente triste no tanis bainhira pesoal saude sira iha loket registu la atende nia, tanba nia la lori livru ne’e.
Antes ne’e, nia halo ona konsulta iha Sentru Saude Vera Cruz maibe tanba iha problema ho oan fatin (kandungan), entaun mediku sira halo referral ba HNGV hodi hasoru mediku espesialista kandungan, maibe lakonsege.
“Hau la lori livrinus ne’e tanba hau lahatene nia prosesu, hau mai husi dader sira labele atende hau,” nia hateten ho tanis iha ospital nasional Bidau, Dili.
Nia dehan, livru ne’ebe pesoal sira husu ne’e iha tanba iha tinan 2010 nia partu iha HNGV, maibe tanba lahatene entaun la lori.
Inan husi oan nain rua ne’e, husu funsionario HNGV inklui mediku sira atu fo atendimentu ne’ebe hanesan ba ema hotu, labele haree ba iha familia.
“Ba ami ne’ebe husi munisipio seluk, ami mai iha ne’e maluk laiha entaun atendimentu ba ami ne’e susar, ne’e mak ami sente laran susar tebes,” nia hateten.
Nia hatutan, ba pasiente sira ne’ebe iha Dili ne’e diak tanba konese mediku barak ne’ebe presiza hasoru no halo diagnostiku ruma telephone ba deit, la presiza foti nomor no forma.
Entretantu, Xefe Gabiente Controlu kualidade e komunikasaun HNGV, Paulina Pinto hateten sistema ne’e la’os foun maibe uluk kedas adopta pasiente ne’ebe mai atu halo konsulta iha OPD no check-up tenke registu.
Nia dehan, orario ne’ebe iha mak hahu dader 7:30 official registu sira to’o ona iha fatin hodi fahe numeru ne’ebe prepara ona ba pasiente sira no iha tuku 8:30 hahu bolu numeru no registu hodi diriji ba iha mediku sira tuir moras ne’ebe iha.
“Ospital la autoriza pasiente ne’ebe mai ho referral la haruka fila, maibe karik failha iha komunikasaun ruma, ne’ebe ami sei buka hatene,” nia hateten.
Nia esplika, regras ne’ebe iha mak pasiente foun tenke ba uluk sentru saude sira hodi hetan karta referral husi mediku ruma atu hasoru mediku espesialista sira ou halo diagnostiku ruma.
Nia hatutan, kualker karta referral ida sira konsidera bele elektronika no hakerek ho liman, importante mediku tenke halo referral ba ospital no hasoru mediku espesialista ida ne’ebe?
