Moras kulit hanesan skabiosis no hena mutin (panu) registu aas iha sentru saude Becora (SSB) depois de moras inspesaun respiratoriu (ISPA).
Diretora SSB, Adelina Pinto hatete kada fulan sira registu pasiente moras kulit nain 100 resin.
Nia hatete, moras ida ne’e iha ligasaun ho ema nia higiene pesoal tanba ne’e alende fo tratamentu, sira mos fo edukasaun saude ba komunidade sira kona ba prevensaun moras kulit sira.
“Ami menus oituan mak cream, maibe ami nafatin esforsu liu –liu foti fali husi postu saude sira ne’ebe stok sei iha atu fo ba pasiente bainhira presiza los,” nia dehan.
Entretantu espesialista kulit, doutora Odete Viegas hatete skabiosis ne’e moras kulit hada’et ida ne’ebe kauza husi parasit.
Nia dehan, sintomas ba moras ida ne’e mak katar iha isin sira ne’ebe sensitive hanesan kalilin, ain no liman let sira, e katar maka’as iha tempu kalan.
“Moras skabiosis tama mos iha numeru ne’ebe bo’ot, liu –liu iha area rural tanba laiha higiene diak,” nia hateten.
Moras kulit bele halo tratamentu no kura, maibe nia dehan pasiente mos tenke iha higiene ne’ebe diak tanba moras kulit iha ligasaun ho higiene pesoal.
Nia dehan, moras kulit ne’ebe registu iha Timor –Leste mak skabiosis, hena mutin, alergi no seluk tan.
Nia hatutan, moras kulit mak moras kronika ne’ebe bele lakon bainhira halo tratamentu no mos bele mosu fali kuandu higiene ladiak.
