Labarik ho idade tinan lima mai kraik iha teritorio tomak hamutuk 97% mak hetan ona imunizasaun tuir dadus nasional husi Ministerio Saude tinan 2016 nian.
Primeiru Ministru, Rui Maria de Araújo hatete programa vasinasaun iha durante tinan 2015-2016 iha Timor-Leste hatudu progresu signifikante tebes, liu –liu asesu ba servisu vasinasaun, maibe presiza hadia no haforsa liu tan linha koordenasaun ho lideransa local sira.
Nia dehan, papel lideransa local importante tebes atu servisu hamutuk ho pesoal saude sira hodi fahe informasaun ba komunidade kona ba importansia ba loron vasinasaun nian, atu komunidade bele lori sira nia oan ba fasilidade saude iha data ne’ebe terminadu.
Tanba nia dehan, aimoruk vasinasaun ne’e bainhira loke ona tenke uza hotu se la’e estraga deit.
“Informasaun la hato’o ba komunidade, sira lahatene , lori sira nia oan to’o mai iha fasilidade saude ita hatete aban mak mai fali, entaun sira ba la mai ona tanba ne’e hau husu atu haree didiak nune’e bele iha koordenasaun ne’ebe diak entre pesoal saude no lideransa local sira,” nia hateten, iha lansamentu semana vasinasaun iha Sentru Saude Becora, Dili.
Nia dehan, governu ho apoia husi parseirus UNICEF, GAVI no Organizasaun Mundial Saude (WHO) nafatin haforsa programa ne’e hodi hasa’e area kobertura atu asegura labarik hotu hetan asesu ba vasina.
“Tinan –tinan ita iha kuaze 40 e tal mil criansas mak moris, sira hotu tenke hetan vasinasaun molok sira kompleta tinan ida,” nia hateten.
Nia hatutan, iha vasinasaun lubuk ida hanesan vasina hepatitis B, polio, tetanus pertusis no BCG hodi proteje moras tubercolouse.
Nia mos, husu pesoal saude sira atu buka tuir labarik sira ne’ebe familia la lori mai fasilidade saude atu fo vasina iha uma.
Entretantu Xefe Suku Bemori Cristalina Oliveira, prontu atu servisu hamutuk ho pesoal saude sira iha sentru saude hodi fahe informasuan ba komunidade sira kona ba importansia husi imunizasaun.
“Nudar xefe suku no inan ida, hau hanoin imunizasaun ne’e importante tebes hodi proteje labarik sira husi moras,” nia hateten.
Nia rekonese, la fasil atu konvense komunidades maibe ne’e sira nia responsabilidade atu nafatin fo hanoin ba inan sira kona ba importansia husi imunizsaun ba labarik sira.
Iha parte seluk, reprezentante UNICEF iha Timor –Leste, Desiree Monique Jongsma konkorda katak servisu vasinasaun iha Timor-Leste diak tebes, tanba taxa labarik asesu aas.
Tanba ne’e, nia dehan Timor –Leste tenke mantein ida ne’e no esforsu atu hadia nafatin nune’e labarik hotu bele asesu ba iha servisu ida ne’e.
“Timor iha linha koordenasaun ne’ebe diak tebes entre ospital, sentru saude no postu saude sira hodi ajuda komunidade liu –liu labarik atu hetan imunizasaun,” nia hateten.
Alende ne’e, nia afirma governu mos estabelese programa outreach ho naran saude familia ne’ebe diak tebes hodi asegura familia hotu iha area remotas mos asesu ba servisu saude.
Nia espera, laiha tan labarik ida mak la hetan vasina iha Timor –Leste.
