Governu liu husi Miniteriu Administrasaun Estatal (MAE) informa prosesu desentralizasaun inklui preparasaun ba eleisaun jeral 2017 ba embaixadores ne’ebe hala’o misaun iha Timor –Leste.
Ministru Administrasaun Estatal, Dionisio Babo Soares rekonese katak difisil tebes ba sira atu asesu informasaun ne’ebe iha, entaun ne’e dever governu nian atu informa prosesu tomak ne’ebe la’o iha rai laran.
“Ami konvida sira mai fo briefing sobre prosesu dezentralizasaun no poder local ne’ebe ita hahu deskonsentra dadaun ba iha munisipios no preparasaun ne’ebe ita halo ba eleisaun jeral 2017,” nia hateten hafoin halo enkontru ho embaixador sira iha kampaun UNDP Kaikoli, Dili.
Tuir nia, briefing ne’e importante tebes atu sira bele iha konesementu no hatene esforsu no prosesu ne’ebe governu halo, tanba durante ne’e sira lee deit iha jornal no rona ema koalia.
Prosesu desentralizasaun, nia hateten iha faze tolu ; faze deskonsentrasaun, desentralizasaun no faze sentralizasaun administrativa e agora dadaun hahu ho faze deskonsentrasaun.
Nia esplika, dezkonsentrasaun administrativa katak governu sentral distribui rekursus humanus inklui orsamentu balun ba iha governu local hodi jere rasik, maibe ho montante ne’ebe ki’ik.
Enkuantu desentralizasaun administrative, nia hateten governu sentral entrega poder tomak ba governu lokal atu jere rasik sira nia osan husi riku soin ne’ebe kada munisipius ne’e iha.
Bainhira munisipios hirak ne’e susesu implementa faze rua ne’e, mak nia dehan sei tama ba iha sentralizasaun, katak totalmente independente, la depende ona ba iha governu sentral (tantu orsamentu no rekursus humanus).
Nia informa mos, katak prosesu ida ne’e la’o tinan naruk hahu 2002 maibe la konsege implementa tanba laiha baze legal, agora iha ona baze legal no hahu implementa ona.
Agora dadaun, nia hateten ekipa ministerial (Ministerio Obras Publiku, Ministeriu Adminstrasaun Estatal inklui Ministerio Finansas) analiza hela kapasidade autoridade munisipios hodi define montante orsamentu ba implementasaun programa ne’e.
Entretantu Embaixador Japaun iha Timor –Leste, Eiji Yamamoto hateten informasaun sira ne’e importante no ajuda tebes sira hanesan parseirus atu kontribui.
“Hau hanoin esplikasaun ne’ebe ajuda tebes hodi ami bele ajuda governu Timor –Leste hala’o eleisaun ne’ebe livre no justu,” nia hateten
Esforsu ne’ebe governu tenke halo mak, nia dehan hasa’e numeru votante no promove involvementu feto iha vida politika.
Enkuantu enkontru ne’e inisia husi governu hodi responde ba iha pedidu diplomata sira nian no supporta husi agensia UNDP.
