Tan deit haree mane seluk kaer nia konjuje (vitima) nia liman iha kampus, mane ida (arguido) baku vitima to’o liman naksalak, ikus mai hasoru malu iha tribunal.
Tuir MK (vitima), katak iha 07/08/2015 oras tuku 12 meudia, arguido mai foti vitima iha kampus maibe iha altura ne’eba vitima tuur hela ho kolegas, wainhira haree arguido mai vitima hamrik ho intensaun atu ba hasoru arguido, maibe iha momentu ne’eba bainhira vitima hamrik, nia kolega mane ida kaer vitima nia liman hodi husu kona ba asuntu eskola nian.
No durante tempu konversa ne’e, vitima nia kolega ne’e la husik vitima nia liman, ho attitude ne’e halo arguido nervosu no invejar (cemburu).
“Wainhira hau iha motor leten, nia murmura ona hau, maibe hau nonok deit,” vitima MK deklara iha julgamentu Tribunal Munisipal Dili.
Nia hateten, bainhira to’o iha uma, arguido komesa husu perguntas oin-oin no hasai liafuan mal edukadu e altura ne’eba vitima sente nervozu, maibe vitima nonok deit, no lakoi responde perguntas tanba vitima laiha relasaun domin ho kolega ne’e.
“Nia trata hau, nia dehan mane ne’e hau nia doben, hau nonok deit maibe nia nervosu hodi baku hau, no silu hau nia liman to’o naksalak,” nia hateten.
Hafoin rona tiha deklarasaun husi vitima, juis prezidente husu ba arguido atu presta deklarasaun, maibe arguido hili nonok hodi prova katak akuzasaun hirak ne’e loos hotu.
Iha fatin hanesan advogadu ba arguido, hateten durante moris hamutuk arguido foin mak halo agregasaun fiziku dala ida hasoru vitima tanba senti invejar, no husu ba tribunal atu fo pena ne’ebe kmaan.
Enkuantu reprezentante husi Ministeriu Publiku husu ba tribunal atu fo pena ne’ebe adekuadu ba arguido, atu nune’e iha future la bele komete tan krimi hanesan.
Entretantu hafoin rona tiha deklarasaun husi vitima, juis prezident deside pena suspensaun tinan ida ba arguido.
