Mane (arguido) ida hetan pena prizaun tinan tolu inklui selu kustu judicial $50 tanba baku lezada ne’ebe nudar nia fen rasik to’o desmaia.
Tuir akuzasaun ne’ebe lee sai husi juis prezidente, katak iha 16 Setembru 2013, tuku 17:00 otl, arguido ho lezada han hela, derepente arguido tuda bikan ba rai, no lezada dehan ba arguido katak “bikan la sala”, hafoin ne’e arguido hamrik buti kedas lezada nia kakorok, tuku dala barak iha liman karuk, basa dala barak iha oin no rasta lezada nia liman no lori kadeira baku ba iha lezada nia liman karuk no ain karuk no tebe kadeira rabat ba iha lezada nia kotuk laran.
Hafoin lee sai akuzasaun hirak ne’e, juis prezidente husu ba arguido atu hili koalia ou nonok, maibe iha altura ne’eba arguido hili koalia, hodi dehan nia halo hahalok ida ne’e ne’e, tanba lezada bandu nia atu labele hemu tua.
“Nia bandu hau labele hemu tua iha hau nia aman sarani nia uma,” arguido hateten.
Maske nune’e, arguido sente arepende ba hahalok ne’ebe nia halo ba lezada no jura ba tribunal, katak sei la halo tan aktu hanesan iha futuru.
Iha tempu hanesan Ministerio Publiku mos akuza arguido kontra artigu 154 kodigu penal (KP), kona ba maus tratus ba konjuje no konjuga ho artigu 35 letra (a) Lei Kontra Violensia Domestika.
Tanba tuir artigu 154 KP, defini katak ema ne’ebé prátika maus tratus fíziku ka psíkologia ba nia kónjuje ka ba ema ne’ebé moris ho nia hanesan fen ho la’en sei hetan pena prizaun tinan rua to’o tinan neen.
Iha alegasaun finál, Ministériu Públiku konsidera faktus hotu iha akuzasaun provadu, tanba ne`e husu ba tribunál kondena arguidu ho pena prizaun tinan tolu no suspende ba tinan hat, tanba aktu ne`e rezulta lezada sofre bubu maka’as iha ain no liman karuk, bubu iha kakorok no halo tratamentu iha óspital durante semana ida.
Hafoin rona leitura husi Ministeriu Publiku no rekonesementu husi arguido, tribunál hanoin katak agresaun ne’ebé arguido komete hasoru lezada ne’e grave, tanba la fó biban ba lezada hodi reziste. Agresaun ne’e konsidera nu’udar hahalok ne’ebé kruel hasoru lezada hanesan arguido nia fen.
Tanba ne’e juis prezidente deside fo pena prizaun tinan tolu suspende ba tinan lima no selu kustu judisiál $50. Alende ne’e tribunál mós aplika pena adisionál ba arguido atu aprezenta-an periódika kada fulan dala ida durante tinan 1 iha tribunál.
