Arguida JX tenke hatan iha Tribunal Munisipiu Dili tanba baku lezada FL to’o ibun ran, ho razaun lezada nia oan baku arguida nia oan.
Tuir akuzasaun ministeriu publiku ne’ebe lee sai husi juis prezident, katak iha data 12 Setembru 2015, tuku 9 dader, iha Fatu-hada, arguida nia oan ba halimar iha lezada nia uma, maibe lahatene nusa arguida nia oan tanis fila ba uma hodi kesar arguida.
Iha altura ne’eba arguida mai sein iha esplikasaun, tuku lezada nia odamatan no hakilar lezada hodi sai, wainhira lezada sai hasoru arguida foin mak dehan liafuan “nusa” arguida foti kedas telephone hodi tuda lezada hodi rezulta lezada nia ibun konsege ran.
Hafoin lee sai akuzasun hirak ne’e juis prezidente husu ba arguido atu hili koalia ou nonok, maibe iha tempu ne’eba arguida hili nonok hodi prova katak akuzasaun hirak ne’e los hotu.
Iha oportunidade hanesan juis prezidente mos husu ba lezada atu hili koalia ou nonok maibe lezada hili koalia hodi husu ba tribunal atu halo omologu deit entre sira nain rua.
“Hau perdua nia, tanba ne’e hau hakarak dame malu deit,” nia hateten, iha audensia julgamentu.
Iha tempu hanesan, juis prezidente mos hili atu halo omologu entre vitima no arguida hodi absolve tiha kazu ne’e.
