Ministerio Edukasaun asina ona akordu ho Universidade Nasional Timor –Lorosa’e (UNTL) hodi fo formasaun avansadu ba profesores reklamante sira.
Ministru Edukasaun, Antonio da Conçeicão, hateten ministeriu halo ona avaliasaun ba profesores voluntario sira.
Iha avaliasaun ne’e, nia dehan, profesores 800 resin mak preenxe rekezitus ministerio nian, enkuantu nain rihun tolu resin mak la preenxe, entaun tenke tuir formasaun.
“Ita iha ona akordu ho UNTL atu fo formasaun ba sira ne’ebe la preenxe rekezitus,” Ministru da Conçeicão hateten, iha Dili.
Nia hatutan, formasaun ba profesores reklamantes diferente ho estudantes (UNTL) baibain, tanba sira iha ona esperiensia.
“Sira iha ona esperiensia servisu, sira professionalismu, ita presiza ajusta sira nia nivel konesementu no fo rekonesementu iha nivel lisensiatura,”nia dehan.
Iha parte seluk Reitor UNTL, Francisco Martins, rekonese no agora dadaun sira trasa hela planu no orario hodi fo formasaun avansa no eleva kualidade profesores nian.
Nivel formasaun ba profesores reklamantes rihun tolu resin ne’e, nia dehan, avansa ho nivel lisensiatura. “Ida ne’e ministeriu ho universidade deside ona,” nia dehan.
Nia informa, katak primeiru sira sei hahu ho disiplina importante lima ; mak lian Portugues, matematika, fisika, kimika no biologia.
Nia dehan, profesores reklamantes husi munisipio Dili mak sei tuir uluk formasaun (projetu pilotu) no sei implementa tan iha munisipio sira seluk hodi fo oportunidade ba profesores hodi atinji nivel edukasaun ne’ebe ministerio hakarak.
Entretantu Diretor Edukasaun munisipio Viqueque, Emilio Amaral, hateten iha munisipio Viqueque proferoses hamutuk nain 114 mak la preenxe rekezitus nudar profesores.
“Tuir lei, sai profesores tenke nivel edukasaun bacharelatu e iha Viqueque iha nain 114 mak la preenxe rekezitus ne’e,” nia hateten.
Profesores reklamantes nain 114 ne’e, nia dehan, kompostu husi mane 53 no feto nian 61.
