Tribunal Munisipal Dili (TMD) hala’o julgamentu ba kazu violensia domestika ne’ebe involve Arguida AR (fen) hurlele vitima LG (la’en) iha fatin publiku, tanba deskonfia vitima halo adolterio ho feto seluk.
Tuir akuzasaun husi Ministeiru Publiku ne’ebe lee sai husi juis prezidente, katak iha loron Domingo vitima fa’an hela sasan iha merkado, maibe arguida mai hakilar vitima iha ema barak nia le’et, duun katak vitima adolteiro ho feto seluk iha merkado, nunka fila ba uma durante semana ida tomak.
Maibe, vitima iha tempu ne’eba la koaia buat ida, mesmu arguida hasai liafuan mal edukadu ba vitima. La hetene tanba sa, derepenti deit arguida foti fatuk tuda vitima maibe la kona, tuda ba dala rua, kona kedas vitima nia kotuk laran halo nia toba tuun kedas ba rai.
Hafoin tuda tiha, arguida halai kedas ba uma, e ema hotu haree akontesementu ne’e entaun ba kesar polisia hodi ba kaer arguida iha nia uma.
Hafoin lee sai akuzasaun hirak ne’e, juis prezidente husu ba arguida presta nia direitu hodi hili koalia ou nonok, maibe iha altura ne’eba arguida hili nonok hodi rekonese katak akuzasaun ne’e loos.
Hafoin ne’e juis prezidente husu ba vitima atu fo nia deklarasaun ba tribunal no iha momentu ne’eba vitima hili koalia, hodi dehan nia fo perdaun ba arguida ba hahalok ne’ebe mak arguida halo ba vitima, mesmu agora dadaun vitima no arguida la hela hamutuk ona.
“Hau deside atu hela ketak-ketak, tanba hahalok arguida nian ne’e ladun diak, hau responsible ba hau nia oan nain ida ne’ebe mak iha nia, hau perdua nia,” vitima hateten.
Nia mos rejeita, katak liafuan selingkuh (adolteiru) ne’ebe mak arguida duun ba nia ne’e la loos, tanba durante ne’e vitima servisu deit hodi responsible ba arguida no sira nian oan nia moris.
“Hau buka osan ba ami maibe nia sempre deskonfia hau tuun sa’e, no tuda hau iha fatin publiku,” vitima deklara.
Maibe, nia dehan, nudar humana no nudar inan ba nia oan, entaun vitima perdua arguida ho laran luak, no husu ba tribunal atu tetu kestaun ne’e.
Hafoin rona tiha deklarasaun husi vitima, juis prezidente fo pena suspensaun tinan ida no husu ba arguida atu labele komete tan krimi ruma, se la’e sei tama diretamente ba prizaun.
