Tribunal Munisipal Dili (TMD) hala’o julgamentu ba kazu krimi ofensas integridade fizika simples ne’ebe involve arguido SD (maun) baku vitima YH (alin), tanba haksesuk malu motor.
Iha audensia julgamentu, vitima hato’o nia deklarasaun ba tribunal katak, iha Segunda-feira, fulan Marsu 2015, vitima husu motor ba arguido atu uza ba area branca, inisiu arguido hatan hodi autoriza vitima lori motor ne’e.
Maibe iha minute hira nia laran arguido hetan telephone husi nia doben, entaun arguido hateten ba vitima katak arguido ba lalais deit fila mak vitima uza fali motor ne’e.
“Entaun ho pasensia hau hein nia, maibe besik ona oras hat nia laran nia la mai deit, e hau koko telephone ba nia maibe nia halo mate,” vitima YH deklara iha tribunal.
Maibe nia dehan, iha altura ne’eba arguido konsege fila tuku 8 kalan, vitima sente nervosu nune’e wainhira arguido atu hakat ba uma laran, vitima tolok kedas arguido.
“Hau nervosu, ami konsege iha diskusaun naruk no ikus mai nia baku hau, tuku no tebe hau nia hirus matan,” nia deklara.
Maibe vitima informa, durante prosesu justisa formal la’o hela, arguido konsege husu ona diskulpa ba vitima no sira nain rua diak malu ona.
Hafoin rona tiha deklarasaun husi vitima, juis prezident husu ba arguido atu hili koalia ou nonok, maibe arguido hili nonok hodi prova katak deklarasaun ne’e loos hotu.
Enkuantu iha tempu hanesan, juis prezidente tama kedas iha alegasaun husi Ministeriu Publiku ne’ebe husu tribunal atu fo pena ne’ebe adekuadu ba arguido, tanba hahalok ne’ebe mak arguido halo ne’e kontra ona lei artigu 145 kodigu prosesu penal kona ba krimi ofensas ba integridade fizika simples.
Entretantu juis president deside fo pena suspensaun tinan ida ba arguido no husu ba arguido atu labele repete tan aktu hanesan, sei komet tan maka sei tama prizaun direitamente.
