Tribunal Munisipal Dili (TMD) halo julgamentu ba kazu ofensas integridade simples ho forma violensia domestika ne’ebe involve arguido DG (la’en) ne’ebe baku vitima JL (fen) tanba ulun to’os.
Tuir akuzasaun Ministeriu Publiku ne’ebe lee sai husi juis prezidente, katak iha oras mais ou menus tuku lima ho balu arguido husu ba vitima atu lori osan ba arguido nia alin hodi lori ba foho, maibe vitima hatan “Hau baruk, nusa mak la’os o mak lori ba deit,” maibe iha tempu ne’eba arguido sei nonok deit no la hatan buat ida.
Maibe arguido nafatin haruka no husu ba vitima atu lori osan ne’e no vitima ba loke televisaun hodi nonton no loke volume bo’ot hodi vinze la liga arguido, ida ne’e mos arguido nonok deit hodi tama ba haris fatin hodi haris.
Hafoin sai husi haris fatin arguido husu ba vitima, dehan “o lori ona osan ne’e ba ga,” maibe vitima nonok deit, situasaun ne’e halo arguido nervozu hodi tuda tiha vitima ho tualhea no foti vintunha soe ba vitima maibe la kona, nune’e arguido dada vitima ba kuartu laran hodi tuku no basa vitima.
Hafoin rona tiha deklarasaun ne’e, juis prezidente husu ba arguido atu hili koalia ou nonok, maibe arguido hili koalia, hodi dehan ba tribunal katak arguido baku vitima ho situasaun ne’ebe mak nervosu tanba vitima la tuir saida mak arguido haruka.
“Hau fo osan ba nia hodi fo alin hodi lori ba foho, maibe hau lahatene tanba sa iha momentu ne’eba nia ulun to’os hodi lakohi lori ba,” arguido deklara iha tribunal.
Maibe, depois akontesementu liu tiha loron rua arguido no vitima diak malu ona no agora dadaun hela iha uma ida no halo vida moris nudar fen-la’en hanesan ba-bain.
Hafoin rona tiha deklarasaun husi arguido, juis prezident fo pena suspensaun tinan ida ba arguido no husu ba arguido atu labele repete tan asaun hanesan iha futuru.
