Diretora Ezekutivu Fundasaun Alola, Alzira Reis, hateten tinan ida ne’e (2016) Alola estabelese tan Grupo Supporta Inan (GSI) hamutuk 39 iha munisipio Dili no Regiaun Espesial Oe-Cusse.
Nia dehan, grupu ida ne’e iha papel importante tebes atu halo kampanha edukasaun nutrisaun no planu partu ba komunidades iha munisipio Dili no Regiaun Espesial Oe-Cusse, tanba aproximasaun ba komunidades efetivu liu.
“Tinan 2016 ne’e ami estabelese tan grupo supporta inan 39 iha munisipio Dili no Oe-Cusse, tanba malnutrisaun aas iha area rua ne’e,” Diretora Reis informa, iha nia knaar fatin Mascarenhas, Dili.
Nia hatutan, sira iha ona grupo supporta inan 124 iha munisipio 11 ne’ebe durante ne’e hala’o servisu maka’as hodi hasa’e konesementu komunidades nian kona ba importansia susu been inan nian, nutrisaun no planu partu ne’ebe seguru.
Nia hatutan, governu liu husi Ministerio Saude apresia ho metodologia ne’ebe sira uza hodi aprosima komunidades atu komunidades mak servisu ba malu.
Alende halo kampanha edukasaun nutrisaun, nia dehan, sira mos hala’o atividade demostrasaun tein aihan komplemetar hodi hatudu ba komunidades kona ba hahan local ne’ebe iha valor nutrisaun diak.
“Ami mos halo survey baziku kona ba nutrisaun no halo mos referral ba kazu malnutrisaun bainhira identifika iha treinu,” nia hateten.
Programa edukasaun nutrisaun ne’e hetan apoiu husi organizasaun internasional hanesan World Food Program (WFP), kompanha Conoco Philips no Woodside.
Iha parte seluk Diretora Saude Munisipio Dili, Agustina da Costa Saldanha hateten, kooperasaun servisu ne’ebe munisipio Dili halo ho organizasaun FA haree liu ba iha edukasaun nutrisaun no halo peskiza nutrisaun.
“Atu haree klean kona ba nutrisaun familia no foti mos dadus malnutrisaun iha munisipio Dili,” nia hateten.
Nia dehan, kooperasaun ne’e importante tebes, nune’e bele iha dadus estatistika ida ne’ebe klaru hodi trasa programa ne’ebe integradu ba kombate malnutrisaun iha munisipio Dili.
