Xefe Planeamentu Dezenvolvementu Munisipiu Ermera, Inacio Madeira, hateten postu administrative tolu iha munisipiu Ermera mak idenfikadu sai hanesan potensial ba produsaun kafe barak liu, tanba ne’e husu ba governu atu hadia estradas ne’ebe liga ba fatin tolu ne’e, nune’e komunidades bele asesu ba merkadu.
Komunidades iha fatin tolu (postu administrative Hatulia, Letefoho no Atsabe) ne’e, nia hateten, maioria moris no hetan lukru husi fa’an kafe, maibe labele asesu ba merkadu tanba estradas aat.
“Fatin hirak ne’e mak produsun kafe barak liu, maibe komunidade labele kompete diak iha merkadu tanba estrada aat,” Xefe Madeira hateten, iha Dili.
Nia rekonese, katak iha munisipiu Ermera fatin barak mak bele produs kafe, maibe iha postu administrative tolu ne’e mak kada tinan produs kafe barak liu, tanba fator rai no iklima.
Tanba ne’e, nia sujere ba governu liu husi Ministeriu Obras Publiku e Transportes no Komunikasaun (MOPTK) atu hadia estradas ne’ebe liga ba fatin tolu ne’e, tanba produsaun kafe iha fatin tolu diak no barak liu.
Nia dehan, dalaruma prezensa kafe iha merkadu minimu liu, tanba kauza husi estrada aat ne’ebe halo komunidades laiha vontade atu asesu ba merkadu.
Iha fatin seluk Ministru Gasto de Sousa, rekonese kestaun ne’e, e iha tinan 2016 ne’e governu sei halo mudansa ba orsamentu hodi hadia estrada rurais.
“Oinsa komunidade bele lori sira nia produtu mai iha merkadu, ida ne’e mak ita esforsu hela atu halo iha tinan ida ne’e,” Ministru Sousa hateten.
Maibe, nia la promote, katak iha tinan ida ne’e estradas iha area rural sei rehabilita iha tinan ida ne’e, tanba tenke haree ba alokasaun orsamentu ne’ebe iha.
“Tenke komprende oinsa ita nia kapasidade ezekuta,” nia hateten.
