Tribunal Munisipal Dili (TMD) hala’o julgamentu ba kazu ofensas ba integridade fizika simples Ho forma violensia domestika ne’ebe involve arguido MG (la’en) halo moe lezada LV (fen) iha fatin publiku hodi lezada husu divorsio kedas, maibe tanba la simu entaun arguido tuku no tebe lezada.
Bazea ba akuzasaun ministeriu Publiku ne’ebe lee sai husi juis prezidente, katak iha Kinta- feira fulan Fevereiru 2015, deskonfia lezada halo adolteiru entaun iha momentu ne’eba arguido ba hafuhu lezada iha lezada nia kantor no iha altura ne’eba lezada koalia duni ho mane ida iha fatin servisu, maibe mane ne’e nudar lezada nia xefe no iha altura ne’eba koalia kona ba asuntu servisu nian.
Tanba deskonfiansa demais liu, entaun arguido tama ba kantor laran hodi hakilar lezada no dada lezada sai ba liur no halo ema hotu haree ho saida mak akontese, tanba senti moe lezada dada kedas arguido nia liman hodi haruka arguido hamoris motor no lori lezada ba uma.
No to’o iha uma, lezada husu kedas divorsiu ba arguido, tanba lezada la tahan ona ho hahalok ne’ebe mak arguido halo ne’e, maibe tanba la simu ho liafuan ne’e, arguido tuku no tebe lezada.
Tanba lezada la simu ho hahalok arguido nian ne’e, entaun lezada ba hato’o keixa ba polisia no prosesa iha tribunal.
Hafoin lee sai akuzasaun hirak ne’e juis prezidente husu ba arguido atu hili koalia ou nonok, maibe arguido hili nonok.
Nune’e juis prezidente husu mos ba lezada atu hili koalia ou nonok, maibe lezada hili koalia hodi dehan ba tribunal, katak arguido iha momentu ne’eba halo duni attitude ne’e maibe depois de ne’e arguido la halo tan ona.
“Agora dadaun ami diak malu ona, tanba wainhira kazu ne’e prosesa hela, hau nia tiun sira mai rezolve ona,” lezada hateten.
Hafoin rona tiha deklarasaun husi lezada, juis prezidente deside fo pena suspensaun tinan ida ba arguido, no husu ba arguido atu la bele repete tan aktu hanesan iha futuru.
