Membru Parlamentu Nasional Deputada Josefa Alvares Soares, hateten agrikultor barak mak abandona ona sira nia natar e situasaun ida ne’e afeita ba produsaun haree iha rai laran.
Nia hateten, agrikultores komesa husik sira nia natar tanba irigasaun barak mak la funsiona e traktor lubuk ida mak aat, entaun komunidade ne’ebe iha interese halo natar komesa menus, konserteza fo impaktu ba iha produsaun haree kada tinan.
“Sira baruk halai natar ona, tanba irigasaun aat, traktor barak mak aat no traktor sira ne’e mos fahe la ekilibriu ida,” Deputada Soares kestiona, iha Parlamentu Nasional.
Tanba ne’e, nia sujere ba governu tenke hadia kondisaun sira ne’e no enkoraja grupu agrikultura sira atu produs haree barak liu, duke kada tinan sempre hasai osan lubuk ida hodi sosa fos husi rai liur.
Nia dehan, governu tenke halo jestaun ba bee, nune’e iha tempu bailoron mos komunidade kontinua halai natar.
“Presiza halo prezervasaun kona ba bee, atu nune’e agrikultura sira bele uza, mesmu iha tempu bailoron,” Deputada ne’e apela.
Iha fatin seluk Diretor Nasional Agrikultura e Hortikultura Amaro Ximenes, rekonese kestaun ne’e, tanba iha tinan 2002 konsege estabele grupu agrikultura hamutuk 700, maibe la kleur grupu sira balun dada aan no lakohi halo natar.
“Ne’e akontese, tanba hau haree sikun ida ne’ebe mak problema liu mak desizaun politika, sei desizaun politika la’o diak, maka produsaun haree mos bele la’o diak,” nia hateten.
Nia esplika, iha 2002 produsaun haree sae maka’as tanba 18 mill hektares natar funsiona hotu , no grupu ne’ebe mak estabelese aktivamente halo’o sira nia servisu.
Maibe, nia dehan, iha 2008 produsaun haree komesa tun, tanba natar barak mak abandonadu, konserteza fo impaktu ba produsaun haree atu sa’e.
Ministeriu Agrikultura e Pescas (MAP) sei servisu maka’as tan hamutuk ho ministru foun ne’ebe mak iha komitmentu atu hadia situasaun ne’e no sei hadia produsaun haree iha rai laran, hodi hamenus importasaun fos husi rai liur.
