Diretor Jeral (DJ) Servisu Kooperativus Ministeriu Edukasaun (ME), Antoninho Pires, hateten ministeriu nunka autoriza profesores hatais roupa arte marsiais no Partidus Politiku (Parpol) nian hodi hanorin estudantes iha klase, tanba ne’e viola regulamentu.
Tanba ne’e, nia dehan, ministeriu liu husi gabinete inspesaun sei tun ba baze hodi halo verifikasaun kona ba asuntu ne’e, depois foti medidas hasoru profesores ne’e, kuandu iha prova.
“Sei hetan sansaun disiplinar, tanba viola ona regras no fora husi regulamentu ministeriu nian,” Diretor Pires hateten, iha Dili.
Tuir regulamentu ministeriu nian, nia dehan, profesores sira tenke uza farda ne’ebe ho motif kulturais.
Antes ne’e Membru Parlamentu Nasional, Deputadu Jorge Teme mos kestiona ona kona ba asuntu ne’e, katak profesores balun iha munisipiu Ermera ho hatais farda partidu politiku no arte marsiais nian hodi hanorin estudantes.
Tuir nia, atitude hanesan ne’e ladun diak, tanba bele istimula fali estudante sira hodi halo tuir hahalok ne’e.
“Profesores laiha disiplina uza fali farda arte marsiais no partidu ninian ba hanorin,” Teme kestiona.
Tanba ne’e, nia husu ba Ministeriu Edukasaun (ME) fo orientasaun klaru ba profesores sira hodi uza farda ne’ebe merese wainhira hala’o prosesu aprendizajen.
“Hau hanoin ne’e la merese, ministeriu kompetente tenke haree ida ne’e,” nia sujere.
