Membru Parlamentu (MP) Nasional, Deputadu David Diaz Ximenes, hateten patrulhamentu ne’ebe durante ne’e polisia sira halo uja deit kareta ladun efetivu, tanba iha deit estradas no la tama direitamente iha bairo laran.
Tuir nia, patrulhamentu uza kareta ne’e sei la rezolve problemas, tanba sira nia operasaun ne’e hanesan cek situasaun deit.
“Ladun diak no efetivu, tanba la fo seguransa direitamente iha bairo laran, sira fo deit seguransa ba polisia sira ne’ebe halo operasaun iha e estrada no postus,” Deputadu Ximenes hateten, iha Parlamentu Nasional.
“Ezemplu ; komunidade baku malu iha bairo laran,sira rona kareta patrulhamente mai sira para tiha, depois kareta ba tiha sira kontinua fali, ne’ebe la resolve problema.”
Tanba ne’e, nia husu, ba komando atu monta polisia iha estradas no postu polisia sira, hodi halo operasaun seguransa duke ho kareta.
Hatan ba kestaun ne’e Segundu Komandante Jeral Polisia Nasional Timor-Leste (PNTL), Komisariu Faustino da Costa, hateten agora dadaun sira esforsu hela atu hasa’e volume rekursus humanus hodi koloka iha postu polisia sira iha bairo-bairo.
“Ami haree hela, sira ne’ebe mak sei sai husi akademi ne’e, ita sei koloka no fo atensaun ba distritu sira, atu aumenta tan sira nia pesoal,” Komisariu Costa hateten.
