Asisten Administrasaun organizasaun non govermenal Hau Hili atu Kura (HALIKU), Pascoela Barreto, hateten sira kontinua halo sosializasaun ba komunidades area rural kona ba lala’ok moras kankru susun no serviks.
HALIKU nia papel mak, nia dehan, atu hasa’e konesementu komunidades liu –liu feto sira kona ba lala’ok moras kankru susun no serviks ne’ebe akontese ba feto sira inklui mos ajuda halo referral ba pasientes hodi hetan tratamentu iha ospital nasional.
“Dalabarak ami ba fahe informasaun, komunidade sira laiha konesementu entaun sira hakfodak no tauk bainhira rona informasaun no haree imagen sira iha pamfletu,” Barreto hateten, iha servisu fatin Bidau, Dili.
Nia hatutan, sira hala’o ona sosializasaun ba komunidades iha munisipio 10 no sei kontinua e alende ne’e mos ba estudantes ensino sekundario sira atu bele iha konesementu ba lalaok moras kankru no identifikasaun sedu atu halo tratamentu.
Nia hatutan, meus ne’ebe sira uza atu sosializa informasaun ba iha komunidade sira mak organiza seminario iha nivel baze, fahe pamfletu ho informasaun no imagen, mensagen husi radio komunidade sira iha baze.
Nia informa, durante tinan ida ho balun sira registu ona pasiente kankru susun no serviks hamutuk nain 31 ne’ebe halo tratamentu iha Ospital Nasional Guido Valadares (HNGV) no nain ida halo tratamentu iha estrangeirus tanba grave.
Entretantu Fundador HALIKU, Kirsty Sword Gusmão, agradese ba iha Sekretario Estado Politika Formasaun Profesional e Empregu (SEPFOPE) ne’ebe involve ona ekipa HALIKU iha atividades feira de kareira hodi distribui pamfletu ho informasaun baziku ba komunidades no foinsa’e sira iha baze kona ba lala’ok moras kankru.
Sobrevivente ne’e mos, hateten nia parte hala’o ona diskusaun ho lideransa iha organizasaun Fundasaun Alola atu bele integra mos programa HALIKU nian iha sira nia atividades grupo apoiu inan iha suku atu bele halo sosializasaun ba inan feto sira iha baze.
“Hau iha diskusaun ho jerente programa saude inan ho khosok oan iha fundasaun alola iha ona interese atu integra programa HALIKU iha programa saude inan ho kosok oan nia okos bainhira sira fo formasaun ba iha feto maluk sira iha baze koalia mos kankru no enkoraja sira atu aprezenta an iha fasilidade saude,” nia hateten.
Nia hatutan, edukasaun ba komunidades importante tebes tanba esperiensia hatudu detensaun sedu bele salva ema nia vida.
