Organizasaun Fundasaun Alola (FA) ejiji ba governu atu kria regulamentu ida hodi proteje tais origine Timor nian, se la’e bele lakon.
Tanba tuir Diretora Ezekutivu FA, Alzira Reis hateten agora dadaun tais fantasia ne’ebe mai husi nasaun seluk ho motif Timor nian domina ona iha rai laran.
Nia dehan, hateten estado iha obrigasaun atu proteje motif no koor origine tais Timor nian, tanba tais hanesan identidade nasaun no povu Timor –Leste iha mundu.
“Ita Timor seidauk iha lei Ida kona ba copy right, tanba ne’e mak dala barak produtu nasaun seluk mai, ita labele proteje ita nia koor origin rasik, ” Diretora Reis hateten, iha Mascarenhas, Dili.
Nia haktuir, Alola nafatin fo formasaun no motiva grupo feto produs tais sira atu kontinua promove koor origine Timor nian liu –liu uja ai tahan no kulit produs kor atu origine Timor nian labele lakon leet deit, tanba komesa lakon dadauk ona.
Iha parte seluk, Sekretario Estado Koperativa e Industria (SEKI), Filipus Nino Pereira, rekonese kestaun ne’e no ida ne’e akontese tanba seidauk iha baze legal ida hodi proteje tais origine Timor nian.
“Sim, regulamentu ida ne’e responsabilidade governu, liu –liu sekretario estado kultura no ministerio komersio industria e ambiente atu haree iha futuru hodi bele proteje motif no koor origine tais Timor nian,” SE Nino hateten.
Nia haktuir, Timor iha motif no kor origine tais ne’ebe uniku, tanba ne’e ema hotu tenke proteje no promove nafatin atu labele lakon.
