Oras ne’e dadaun diresaun florestal sub-distritu Maliana, distritu Bobonaro infrenta hela problema falta rekursu humanus.
Membru Parlamentu Nasional, Deputada Josefa Alvares Soares, husu ba Ministeriu Agrikultura e Peskas (MAP) atu aumenta numeru guarda floresta iha fatin ne’eba, tanba komunidade sira tesi ai arbiru deit.
“Tanba laiha guarda florestal ne’ebe sufsiente hodi halo kontrolasaun, guarda florestal ne’e nain ida rua deit ne’e, sira atu halo saida,” Deputada Soares hateten, iha Parlamentu Naisonal.
Guarda florestal ne’e, nia dehan, sira nia papel importante tebes, hanesan fo sosializasaun ba komunidade sira atu labele tesi ai arbiru, hakbesik ba komunidade atu oinsa hamutuk proteje ai ne’ebe kategoria potensial inklui mos kuda ai oan.
Alende ne’e, nia hateten, iha mos fatin balun hanesan iha distritu Suai, Aileu no sub-distritu Maubisse kontinua menus guarda florestal.
Tanba ne’e, nia husu governu atu bele aponta kestaun hirak ne’e iha planu orsamentu jeral 2015, hodi nune’e Parlamentu Nasional bele diskuti hodi aprova orsamentu.
Hatan ba kestaun ne’e Ministru Mariano Asanami Sabino, hateten lolos iha tinan ne’e (2014) atu aumenta tan guarda florestal, maibe orsamentu ne’ebe aprova limitadu.
“Osan ba salariu laiha, entaun MAP labele halo rekrutamentu foun,” Ministru Asanami hateten.
Maibe, nia dehan MAP sei aponta kestaun ne’e iha planu Orsamentu Jeral Estadu 2015.
