Polisia Servisu Investigasaun Kriminal (SIK) to’o agora seidauk detekta autor ba kazu omisidu iha Ministeriu Negosiu Estranjeiru no Kooperasaun (MNEK) nia oin, maske fulan ona hala’o prosesu investigasaun.
Diretor Interino SIK, Inspektor Manuel Alves, hateten durante fulan rua nia laran ekipa SIK kumpri delegasaun Ministeriu Publiku nian hodi halo investigasaun atu kompleta dokumentus (faktus).
“Husi prosesu ida ne’e, ami seidauk identifika autor,” Inspektor Alves hateten, iha Kaikoli,Dili.
Tanba ne’e, nia dehan, suspeitu husi kazu ne’e temporariamente konsidera hanesan deskonesidu, tanba seidauk identifika lolos autor.
Kazu ne’e rasik akontese iha dia 01 Marsu 2014, iha MNEK nia oin ne’ebe hamate vitima JP tanba hetan sona iha parte kabun to’o mate.
Antes ne’e nia dehan, vitima JP hemu tua hamutuk ho nia kolega sira iha vitima nia uma, maibe altura ne’eba maiz umenus iha tuku tolu madrugada, vitima lori nia kolega ida fila ba uma (ho motor), depois de ida ne’e vitima la fila no iha dadersan ne’e komunidade hetan vitima ho kondisaun mate ne’ebe latan hela edifisiu MNEK nia oin.
Entretantu membru Komisaun B (seguransa, defeza, negosiu estranjeirus), Deputadu Cesar Valente de Jesus, konsidera kazu ne’e todan no presiza duni tempu atu hetan autor ba kazu ne’e.
“Polisia esforsu hela buka tuir autor ba kazu ne’e,” Deputadu Valente hateten.
