Fundasaun Alola estabelese ona sentru kooperativu hat iha distritu hat, hodi promove no fasilita grupo feto sira nia produtu local bele fa’an iha merkadu, nune’e bele hadia sira nia kondisaun moris.
Diretora Ezekutivu Fundasaun Alola (FA), Alzira Reis, hateten sentru ne’e importante tebes atu fasilita grupo feto sira faan sira nia produsaun no fasil ba vizitantes ruma hakarak kompras buat ruma.
“Uma kooperativa iha distritu hat ne’e hanesan sentru ida, para grupo sira bele tau sira nia produsaun no bele halo diskusaun saida mak sira presiza halo entre grupo,” Chief Executive Officer FA ne’e hateten, iha Mascarenhas, Dili.
Sentru hat ne’e rasik, nia dehan, estabelese iha tinan 2013 no distritu hat ne’e mak hanesan Manatuto, Viqueque, Lospalos no distritu Oe-Cusse, nune’e feto sira iha distritu hirak ne’e sira nia ekonomia bele forte.
Oras ne’e dadaun, CEO FA ne’e, hateten fundasaun halo hela aprosimasaun ba doadores balun hosi supporta fatin eksibisaun ida ne’ebe ho kuantidade bo’ot atu bele akomula hotu produsaun grupo feto sira husi 13 tanba durante ne’e hein deit feira fiar mak sira ba faan depois sira rai deit iha uma.
Aleinde nia dehan, sira nia parte mos kontinua halo avaliasaun ba grupo sira hodi bele kapasita nafatin, hodi asegura kualidade produsaun, tanba alola iha fundus ki’ik ba grupo sira atu hakbi’it an.
Entretante reprezentante grupo produsaun, Adelina Freitas, hateten sentru ne’e importante tebes ba sira hodi bele tau sira nia produsaun.
“Durante ne’e ami hein deit mak feira, kuandu feira laiha ami fa’an deit iha ami nia fatin, maibe la folin,” nia hateten.
Hatan ba kestaun ida ne’e, Sekretaria Estado ba Promosaun Igualdade (SEPI), Idelta Maria Rodrigues, katak ne’e mak problema, tanba sira lakohi promove sira nia produsaun iha nivel distrital.
Nia hateten, bainhira nia assume mandatu iha IV governu konstituisaun, nia hato’o tiha ona hanoin ida ne’e ba Primeiru Ministru atu estabelese sentru ida ba aktividade hotu ne’ebe grupo feto sira produs, maibe la realiza tanba fatin laiha.
“La’os feira deit mak ita hasoru malu, maibe iha fatin proprio ida atu feto hotu-hotu nia aktividades bele tau iha ne’eba, bainaka ruma mai karik ba vizita kreatividade feto Timor nian,” nia hateten.
Nia mos husu ba grupo feto sira hahu hakbi’it an hodi halo mudansas ba produsaun hotu, hadia kualidade, hatudu ba governu katak feto mos bele (produsaun iha kualidade), nune’e governu bele tau konsiderasaun.
