International Republic Institution (IRI) fasilita membru Parlamentu Nasional husi bankada tolu hala’o programa rona povu nia lian iha distritu Ainaro, rona populasaun nia preokupasoens ne’ebe sira infrenta iha baze.
Preokupasoens ne’ebe populasaun distritu Ainaro hato’o ba iha membru PN, mak hanesan problema bee moos, Estrada ligasaun Aileu ba Ainaro at total inklui kondisaun eskola balun at total mos.
Deputadu Leonel Marcal husi bankada Fretilin, hateten programa ne’e diak, atu nune’e deputadu sira mos bele rona preokupasaun povu iha baze.
“Hau rona preokupasaun barak husi povu, kestaun sira ne’e ami sei hato’o iha plenaria,” Deputadu Marcal hateten, iha Ainaro.
Iha fatin hanesan Administrador Distritu Ainaro, Manuel Ramos Pinto, apoia tebes programa ne’e, tanba Deputadu husi bankada tolu ne’e bele deretamente rona povu nia halerik no preokupasaun.
“Hau orgulhu ho programa ida ne’e, tanba deputadu sira mai haree no rona rasik povu Ainaro nia halerik hodi hato’o ba iha governu,” nia hateten.
Entretantu Senior Program Officer IRI, Carlito Nunes, hateten partisipasaun povu Ainaro atu hato’o sira nia preokupasaun ba deputadu nain tolu ne’e masimu tebes.
“Perguntas ne’ebe sira hato’o kualidade tebes, sira nia involvement iha program ne’e mos aktivu tebes, tanba husi linha interministerial iha regional, mestri no autoridade local sira mos mai hotu,” Senior Program Officer IRI ne’e hateten.
